DILI, STLTIMORLESTE.com – Sekretáriu Estadu Asuntu Toponomia Organizasaun Urbana (SEATOU) sensibiliza importansia ba dekretu lei ijiene no ordem publika nian ba membru Falintil-Forsa Defeza Timor Leste (F-FDTL).
“Ohin ekipa konjunto SEATOU mai hamutuk ho F-FDTL nian atu sensibiliza dekretu lei nu.33/88 ba maluk forsa sira hotu, nunee sira bele fahe informasaun sira nee ba fali familia sira, no kolega sira iha sira nia hela fatin,” hatete Sekretáriu Estadu Asunto Toponomia Organizasaun Urbana, Germano Santa Dias Brites ba jornálista sira iha Kuartel F-FDTL Fatuhada, Dili, Tersa (14/10/2025).
Nia dehan, prezensa husi SEATOU nian laos atu hanorin membru F-FDTL, maibe mai partilha deit no fahe informasaun hodi sira bele apar liu tan servisu SEATOU nian iha terenu.
Iha fatin hanesan Xefe Gabinete Apoiu Sosial F-FDTL, Koronel Alberto Pereira dos Santos esplika, F-FDTL iha ninia prinsipiu lei hotu-hotu neebe mak establese husi governu desde sosializa sempre prontu para koopera ho governu, liu-liu konaba ordem publika nian.
“Ami sempre koopera entre ho governu, nunee lei mak haruka ita tenki kumpri ba iha lei, tanba lei nee estabele tiha ona husu F-FDTL atu kumpri, tanba sidadaun hotu-hotu iha lei nia okos,” nia esplika.
Nia informa, durante nee membru F-FDTL mantein kumpri ba ordem publika, tanba bainhira orientasaun Komando dehan A ka B, nee laiha diskusaun no ezekuta tuir deit lei neebe mak estabelese ona.
Nunee nia konsidera katak, dekretu lei nee importante tebes neebe fo biban ba membru F-FDTL atu kumpri mantein hodi ordem publika.
Entretantu dekretu Lei Nu. 33/88 importante tebes iha prosesu dezenvolvimentu nasionál no mantein ordem publika iha TL. Dekretu lei nee fo ba Governu instrumentu jurídiku atu regula no kontrola situasaun publika, liu-liu iha area seguransa no estabilidade nasionál.
Dekretu lei nee fo ba Governu poder atu mantein ordem publika, seguransa nasional, no estabilidade governu.Nomos regula situasaun publika, inklui situasaun emergensia, konflitu, no destabilidade.
Tanba dekretu lei nee sai instrumentu jurídiku importante ba Governu atu halo governasaun, liu-liu iha area seguransa no estabilidade nasionál.
Inklui dekretu lei nee proteje interese nasionál, inklui soberania, integridade territóriu no estabilidade governu.
Jornalista: Jeniche da Costa
Editora: Domingas Gomes
