DILI, STLTIMORLESTE.com – Komando Polisia Nasional Timor Leste (PNTL) hahu rekolha dadus ba iha Kompanhia internasional ida neebe mak hatama deskonfia hatama kontetor ida iha area Tibar, Postu Administrativu Bazartete, Munisipiu Likisa, neebe nakonu ho kilat musan.
Portavos Komando PNTL, Superintendente Polisia, Joao Belo dos Reis dehan, iha semana kotuk deskonfia buat balu lalos, tanba nee mak halo intervensaun ba iha armazen.
“Iha semana kotuk ita deskonfia buat balu la los, tanba nee ita halo intervensaun ba iha armazen. Entaun atu klarifika katak, iha bidon tolu mak iha kilat-musan uzadu tiha ona, laos kilat musan foun, depois kilat musan rahun nee hamutuk karon tolu,” hatete nia ba jornalista sira liu husi Konferensia Imprensa iha Kuartel PNTL, Tersa (14/10/2025).
Nia tenik, evidensia item hirak nee autoridade seguransa asegura ona iha area Tibar nian, no hatama fali iha kontetor laran, save polisia mak kaer nomos dada polisi line.
“No nain ba Kompanhia internasional nee no nain ba sasan mak hatama nee iha hela investigasaun no ita halibur hela dadus, ita mos halo tracking ba ninia lalaok kompania nian rasik,” nia informa.
Nia relata, PNTL mos sei halo koordenasuan servisu hamutuk ho parseiru internasional sira atu detekta sasan hirak nee mak saida no oinsa mak uza ninia perigozu ba nasaun nee oinsa.
“Entaun, ita halo hela crossip para ita bele prosesa ba iha tribunal. Sasan nee ninia original mai husi Amerika depois tranzit iha Singapura, depois tama iha Timor,” nia deklara.
Diretor nee dehan, tuir deklarasaun husi kompania internasional nee katak, sasan sira neebe hatama ho kontetor nee ho ninia objetivu cetak fali kilat musan sai fali kulinan.
“Kompania Internasional nee babain halo explorasaum ba besi tua sira hanesan kareta aat no motor aat sira rekolha iha Timor, depois sira halo takcking sira exporta fali ba rai-liur,”katak nia.
Nia mos haktuir, prosesu investigasaun sei lao hela, nunee seidauk bele konklui katak, kompania internasional nee hatama sasan dala hira ona.
Tanba ida nee primeira vez neebe mak hetan, nunee sei buka tuir karik iha pasadu hetan halo ba atividade sira hanesan nee hotu.
“Ita detekta nee kompania internasionál ida. Ita bele hateten sasán sira nee laos kilat musan ativu lae, maibe nee uzadu tiha ona ninia bahan peledak nee laiha ona, kilat musan neebe uzadu tiha ona mak sira halibur tuir deklarasaun neebe mak sira hateten”, nia koalia.
Nia dehan, PNTL seidauk iha serteza lolos katak, kilat musan nee uzadu tiha ona, nunee PNTL sei husu apoiu parseiru internasional ho sira nia ekipamentu teknolojia atu bele hare kilat musan ninia risku nee oinsa.
Jornalista: Jeniche da Costa
Editora: Domingas Gomes
