DILI, STLTIMORLESTE.com – Tribunal Judisial Primeira Instansia Dili liu husi despaisu ikus ba prosesu primeiru interogatoriu, deside aplika medida Aprezentasaun Periodika (AP) ba arguidu ho inisial JLO, neebe deskonfia tiru nia feen iha Aimutin.
Arguidu lori mai iha Tribunal, no Ministeriu Publiku liu husi Prokurador Turnu Aderito Tilman promove arguidu ho krimi Ofensa Integridade Fizika Grave neebe previstu iha artigu 146 husi Kodigu Penal.
Iha Tribunal Juiz turnu Jumiati Freitas rona tiha arguidu, no ikus mai liu husi despaisu deside aplika medida AP ba arguidu.
Tribunal lee tiha despaisu nee, tuir defeza arguidu nian Defensor Publiku Eustaquio Guterres deklara katak, Tribunal aplika medida AP hodi hein prosesu investigasaun neebe halao husi Ministeriu Publiku.
“Tribunal hatun despaisu katak, medida koasaun neebe adekuadu liu mak Aprezentasaun Periodika mak aprezenta aan semana ida dala ida, maibe deside atu aprezenta aan iha Komando Jeral nia fatin,” dehan Eustaquio ba jornalista sira iha Kaikoli, Tersa (14/10/2025).
Nia esplika, iha alegasaun Ministeriu Publiku (MP) husu Tribunal atu aplika medida koasaun neebe adekuadu, tanba MP haree ba arguidu hanesan membru polisia ida, no segundu aktu neebe arguidu halo nee sei deskonfia hela.
Arguidu rasik informa ba iha Tribunal katak momentu neeba nia iha hela servisu postu Timor Plaza, depois fila tuku 4 dader sente kolen, pistola tau hela iha kabas atu hasai pistola mak diskuidu hakfodak tarutu.
“Sei deskonfia hela, tanba nee presiza MP halo investigasaun klean tan, karik arguidu mak iha intensaun atu tiru nia ferik oan ka, hanesan arguidu dehan diskuidu mak kilat nee tarutu,” dehan nia.
Defeza nee informa, iha alegasaun MP husu Tribunal atu aplika medida Aprezentasaun Periodika ba arguidu, no defeza mos aseita ho pedidu MP nian atu bele investiga klean hodi aselera prosesu nee.
Kona-ba Arma neebe iha, Defeza deklara MP mos husu ba iha Tribunal atu objeitu prendidu entrega fali ba iha Komando. No objeitu nee antes nee MP mos asegura hanesan objeitu krimi lori mai iha Tribunal, tanba nee mak MP husu ba iha Tribunal atu devolve fali objeitu nee ba iha Komando.
Prosesu Primeiru Interogatoriu nee prezide husu Juiz Turnu Jumiati Freitas, Ministeriu Publiku reprezenta husi Prokurador Aderito Tilman, arguidu hetan asistensia legal husi Defensor Publiku, Eustaquio Guterres.
Jornalista: Terezinha De Deus
Editor: Xisto Mendonça
