DILI, STLTIMORLESTE.com – Estudantes feto nain rua (2) husi Eskola Sekundariu Jeral nu. 4 Setembru Balide, sei partisipa ezame nasional no ezame lokal iha iha dia 20 Outubru 2025.
Diretor ESJ nu. 4 Setembru Balide, Sergio A. da Cruz dehan, estudantes feto gravida iha nain rua. Bazeia ba seidauk iha lei ida para estudantes gravida labele tuir ezame, entaun bazeia ba direitu estudantes sira nian, no sira nain rua nee sei partisipa ezame nasional no ezame lokal.
“Estudantes neebe gravida hau hatene iha nain rua. Ita bazeia ba seidauk iha lei ida para estudantes gravida labele tuir ezame, entaun bazea ba direitu estudantes sira nian,no sira nain rua nee sei partisipa iha ezame nasional,naran katak,sira mak tenke hatene sira nian kondisaun. Ami nian preparasaun ba ezame nasional no ezame lokal preparadu ona. Agora dadaun ami nian ekipa hahu servisu hela, taka estudantes sira nian foto ezame ninia, nunee mos pinta dadaun sala neebe mak buradu los nee, ida nee mak agora dadaun ami halao hela, tanba Segunda agora hahu ezame nasional ona. Kona-ba profesor vizilansia sira atu mai nee naran husi edukasaun seidauk haruka mai ami, tanba nee ami hein hela,ami nian Professor sira sei halo vizilansia iha eskola neebe lokaliza iha Dili laran,”dehan Sergio ba STL, Kuarta (15/10/2025).
Sergio dehan, sala neebe mak utiliza ba iha ezame nasional ninia hamutuk sala 28, kada sala estudantes 40. Total estudantes finalista neebe sei partisipa ezame nasional ba tinan ida nee hamutuk 1000 resin.
“Mensajem husi direjente da eskola ba estudantes sira mak kuidadu sira nian saude, tenke hakmatek iha uma estuda. Karik iha problema ruma ho materia balun tenke apoiu malu entre estudantes ho estudantes,atu nunee bele fasilita sira diak liu tan iha ezame nasional nian laran,”tenik nia.
Iha fatin seluk, Diretor Eskola Hotelaria e Turizmu Bekora, Charles F. Guterres hatete, husi sira nian eskola laiha estudante gravida, no total estudantes finalista neebe mak sei partisipa iha ezame nasional nee hamutuk 64.
Jornalista: Jacinta Sequeira
Editora: Domingas Gomes
