DILI, STLTIMORLESTE.com – Dirijenti husi Eskola Sekundáriu Jeral nu. 4 Setembru Balide, husu ba Ministeriu Edukasaun (ME) atu rezolve okupantes neebe sei hela iha areador eskola refere.
Haktuir Diretor ESJ nu. 4 Setembru Balide, Sergio A.da Cruz ba STL, Kuarta (15/10/2025).
Nia dehan, eskola balun komunidade sai ona, hela deit eskola nee komunidade sei hela iha areador refere.
“Ita haree eskola balun komunidade sai ona husi areador eskola, maibe falta ESJ 4 de Setembru deit. Nee mak ami iha nee sente tristi uituan, tanba ita nian komunidade uma kain tolu mak sei hela iha areador eskola ida nee. Ami nian hakarak nee estudantes sira sai nee portaun nee taka ona, para ita bele asegura ambiente eskola nian hodi kuda aifunan ruma,” dehan nia.
Nia deklara, sira rekomenda ba ME karik lais diak liu bele rezolve komunidade sira neebe mak hela iha areador eskola nian, liu-liu iha sira nian eskola,tanba eskola sira seluk komunidade sira husik mamuk ona. Komunidade sira nee prontu atu kopera ho parte eskola nian,karik despaisu ruma tun ona.
Iha parte seluk Adjuntu Inspektor Jeral iha ME, Dodolfo Henrique Aparicio hatete, konaba dadus eskola hira mak iha Kapital Dili komunidade sei okupa hela, maibe eskola lubuk ida mak sei okupa husi komunidade sira, tanba nee husi parte inspesaun jeral nafatin halo kontrolu ba okupantes neebe mak too ohin loron sei hela iha areador eskola Munisipiu Dili.
Jornalista: Jacinta Sequeira
Editora: Domingas Gomes
