BAUKAU, STLTIMORLESTE.com – Sarani sira iha Parokia Santa Terezinha Kelikai lamenta Padre Juvinal Gusmão hetan baku ka agresaun fiziku husi grupu balu iha Aldeia Mokobubu, Suku Lacoliu, Postu Administrativu Kelikai, Munisipiu Baukau.
Liu husi konferensia imprensa Porta Voz, Estevão Gusmão hateten, asaun halo agresaun fiziku hasoru Padre Juvinal Gusmão iha loron 12 Outubru 2025 no seluk tan, mak harahun karreta 2 husi peregrinhu sira ba foho Matebian, hodi impede movimentu peregrinu sira nian ba foho Matebian.
“Ami sarani tomak husi Parokia Santa Terezinha Kelikai lamenta tebes asaun kriminozu ilegal sira neebe sempre akontese beibeik iha area nee, maibe parte Autoridade Seguransa Postu Kelikai la foti medida no la tau seriu hasoru kriminozu hodi kaptura, maibe kontinua husik livre hodi halao nafatin perturbasaun,” hateten Estevão iha Kelikai, Kuarta (15/10/2025).
Porta voz nee ejize Autoridade Seguransa liu liu Komando Polisia Munisipiu Baukau liu husi Polisia Eskuadra Postu Kelikai, atu halo kapturasaun ba autor sira hodi la kria instabilidade iha Postu Kelikai.
Nia salienta, kona-ba kazu agresaun fiziku hasoru Padre Juvinal Gusmão sarani sira, deskonfia envolve husi autor nain 6 mak hanesan EF, ARG, BF, JCF, NF no ARG.
“Naran neebe mensiona ona husu seguransa atu bele kaptura lalais no halo investigasaun klean hodi hetan lia loos no verdade, hodi nunee sarani sira bele satisfeitu,” nia sujere.
Nunee mos sarani, Pascoal Gusmão Belo katak, hanesan sarani la satisfas ho asaun agresaun fiziku hasoru Padre Juvinal Gusmão iha Lacoliu no koondena Suku Lacoliu, tanba fatin Lacoliu dala barak ona peregrinu sira ba foho Matebian hetan mos agresaun fiziku no asaltu iha fatin refere.
“Asaun sira nee ami sarani tomak senti ofendidu tuir loloos ita nia Autoridade Seguransa foti inisiativa kaptura, Suku Lacoliu nee ema hela neebe nee mak bolu Suku nee laos ai laran tuan maibe ita nia Autoridade Suku mos laiha responsavel haree no kontrola,” Pascoal katak
Sarani nee sente triste ho asaun agresaun fiziku hasoru Padre, tanba iha Kelikai akontese ona dala 2, dahuluk baku padre Parokia Santa Terezinha Kelikai iha kartoriu laran no daruak tebe Padre Juvinal Gusmão iha area Suku Lacoliu bainhira ho motor husi Ossolia ba Kelikai Vila.
Nia konsidera, asaun hasoru Padre sira nee estraga imajen Parokia Santa Terezinha Kelikai no Igreja Katolika iha Timor-Leste, tanba nee husu Autoridade Seguransa halo investigasaun klean ba kazu refere.
Too notisia nee publika jornalista STL la hetan komentariu husi Padre Juvinal Gusmão, tanba daudaun halao hela servisu iha Igreja Parokia Kristu Rei Liurai Lautem, maibe informasaun neebe STL asesu Komando Polisia Munisipiu Baukau liu husi Eskuadra Postu Kelikai bolu ona suspeitu nain 6 ba kazu nee.
Jornalista: Tomas Reis
Editora: Carme Ximenes
