DILI, STLTIMORLESTE.com – Tais nuudar identidade kultura Timor Leste (TL) nian, tanba nee Governu hamutuk ho parseiru sira sei prezerva no promove diak liu tan.
Sekretaria Estadu ba Igualdade (SEI), Elvina Sousa Carvalho hatete, tais nuudar identidade kultura TL nian, esforsu lubuk ida lao hela. TL iha rede suru nain no iha Komisaun Prezervasaun nomos iha Ministeriu Turizmu Komersiu no Industria (MTKI), Ministeriu Arte no Kultura, SEI nomos Timor Aid.
“Oras nee Governu hamutuk ho parseiru sira kontinua halo esforsu oinsa prezerva no promove tais. Maibe problema neebe ita iha mak bainhira ita hakarak iha tais tradisional, ita mos tenke kuda ai sira neebe fo tinta. Ida nee mak agora menus ba dadaun no atu lakon,” katak nia ba Jornalista iha Munisipiu Ermera, Kuarta (15/10/2025).
Nia dehan, oras nee Sekretaria Estadu Arte no Kultura (SEAK) halo hela esforsu masimu ho Ministeriu Agrikultura oinsa bele prezerva ai sira neebe fo kor natural ba tais sira, nomos kabas neebe agora menus ba dadaun.
Nia hatutan, linas ministerias sira halo hela esforsu, no SEI nafatin halo advokasia liu liu konaba prezervasaun tais.
Nunee mos Prezidente Komisaun F Iha Parlamentu Nasional, Maria Gurumali Bareto hatutan, feto sira iha kapasidade atu suru tais maibe difikuldade ba sira atu suru tais original, lo-loos nee tenke mai husi kabas.
“Atu halo tais neebe orijinal lolos tenke mai husi kabas, ou kabas metan. Ida nee mak difikuldade neebe ami levanta iha Parlamentu oinsa mak Ministeriu Agrikultura laos haree deit ba modo holtikultura sira, maibe fo mos oportunidade ba agrikultura sira komesa kuda kabas,” katak Deputada nee.
Nia afirma, se laiha kabas, inan feton sira sosa iha loja mak hodi suru tais, mais tais orijinal lo-loos mak husi kabas.
Jornalista: Emerenciana Pinto
Editora: Domingas Gomes
