BAUKAU, STLTIMORLESTE.com – Sidadaun neebe halo agresaun fiziku liu husi tebe Padre Juvinal Gusmão iha Suku Lacoliu, Postu Administrativu Kelikai, Munisipiu Baukau, nuudar tula ain ba Jesus Kristu.
Bispu Diozese Baukau, Dom Leandro Maria Alves haktuir, informasaun neebe parte Dioseze simu husi Padre Juvinal Gusmão katak, iha loron 12 parte tuku 05:00 madrugada no haree motor 3 sai husi Ossolia nunee nia parte ho motor mio beat tuir atu ba katekista ida nia uma iha Kelikai hodi troka no kontinua viajem ba Munisipiu Lautem atu prezide misa nova, maibe too iha area Lakuliu hetan jovem nain 3 no nain 1 mak tebe Padre Juvinal Gusmão husi kotuk.
“Pois nia para, nia atu monu la monu entaun konsege para nia fila husu tansa imi tebe hau, hau Nai Lulik ida, bainhira sira rona dehan nia Nai Lulik sira rona halai, hau hanoin akontesementu ida nee dala ruma mai ho jovem sira nia haree malu la diak mak halo asaun ida nee, asaun sira nee ita haree relasaun sira neebe la duun diak neebe mak presiza hasees husi jovem sira neebe iha atetude sira hanesan nee,” hateten Dom Leandro iha Vila Antiga, Baukau, Kinta (16/10/2025).
Bispu Diozese Baukau nee konsidera, asaun tebe Padre Juvinal Gusmão iha motor leten nee, nuudar diskuidu, tanba bainhira jovem refere tebe iha Padre nia kotuk laran no padre hasai liafuan “Hau Amu Lulik” joven sira rona liafuan nee hodi halai.
Nunee asaun neebe halo ba Padre Juvinal Gusmão dala ruma joven sira odiu malu ho problema seluk, tanba nee prezisa hases joven sira husi atetude sira odiu malu nian.
Bainhira jovem sira iha problema la loos uza forsa atu baku malu, maibe uza kakutak hodi koalia malu, tanba uza forsa bele hakanek neebe laiha sala hanesan akontese ba Padre Juvinal Gusmão iha Lakuliu Kelikai neebe hetan tebe husi jovem ida husi jovem nain 3.
Padre Juvinal Gusmão neebe hetan tebe husi jovem ida, Dom Leandro Maria Alves konsidera, jovem refere tula ain ba Jesus Kristu, tanba Padre nuudar saseluk husi Jesus Kristu.
“Ita hatene karak nai lulik hanesan kristu nia saseluk hanesan alta kristu neebe mak reprezentante ita nia Jesus Kristu, hau hanoin iha direitu kanoniku mos iha ninia sansaun ba ema sira neebe mak halo hanesan nee, maibe igreja hanesan inan sempre buka atu promove mak hahalok domin no perdaun nian, ita nai jesus kristu iha kruz tutun mos perdaun, hatene katak Amu Juvinal mos ami rua koalia atu perdua pois hodi hanorin fo hatene ba ita nia jovem sira katak hahalok violensia la diak,” Dom Leandro akresenta.
Mezmu Igreja nuudar inan neebe promove hahalok domin no perdaun, maibe Padre Juvinal Gusmão nuudar vitima hatoo ona keixa iha Polisia Eskuadra Postu Baukau no daudaun kazu nee too ona Komando Polisia Munisipiu Baukau, tanba nee Dom Leandro Maria Alves husu Polisia asegura lalais autor sira hodi eduka hakbiit hahalok violensia.
“Ita husu Polisia iha momentu nee mos Amu Juvinal kontaktu ona Polisia sira hola ona dadus ita hein katak bele hetan ema sira nee koalia ho sira oinsa mak rezolve soe tiha hahalok ida hanesan nee husi ita hanesan jovem,” Dom Leandro sujere.
Liga asuntu nee Jornalista STL tenta komfirma Komando Polisia Munisipiu Baukau, maibe komandante Munisipiu laiha fatin atu fo komentariu, tanba tuir hela atividade importante balu iha Dili.
Jornalista: Tomas Reis
Editora: Carme Ximenes
