DILI, STLTIMORLESTE.com – Komunidade Aldeia Vale de Lahane, Suku Lahane, Postu Administrativa Vera Cruz, Munisipiu Dili, sosa deit bee moos litru rihun 5 ho presu husi US$ 25 too US$ 30, hodi uza ba nesesidade loron-loron nian.
Deputadu Bankada FRETILIN, Antoninho Doutel Sarmento hateten, komunidade sira hola deit bee moos, tanba durante nee hatoo ona preokupasaun nee ba iha Bee Timor Leste Empreza Publika, maibe too agora seidauk rezolve.
“Ita nia komunidade iha Aldeia Vale Lahane maioria la asesu ba bee moos, dala barak ona sira hatoo ba Bee Timor Leste Empresa Publika maibe BTL nunka ba iha neeba atu rezolve problema nee, tanba nee ita nia komunidade sira tenke sosa bee moos husi kampanhia privadu sira, rihun 5 litru ho presu US$ 25 to US$ 30,” dehan Deputadu Antoninho iha Parlamentu Nasional, Kinta (16/10/2025).
Nia hatutan, bee moos hanesan nesesidade importante ba ema nia moris, tanba nia komunidade sira husu ba Bee Timor Leste Empreza Publika atu urjentimente rezolve problema nee.
“Tanba nee komunidade sira husu BTL, oinsa mak ba rezolve lalais problema ida nee,” dehan nia.
Jornalista: Alberto Menezes
Editora: Carme Ximenes
