DILI, STLTIMORLESTE.com – Portavoz Seguransa Interinu iha Ministeriu Interior, Superintendente-Assistente Polisia, Mouzinho T. Correia hateten, Dirasaun Seguransa Investigasaun Kriminal (DSIK) hamutuk ho Komando Munisipiu Kovalima prende sasan kontrabandu hanesan sigaru ho montante 398 ball neebe suspeitu sira hatama iligal husi nasaun Kambodia.
“Iha loron 6 Outubru 2025, DSIK hamutuk ho Komandu Munisipiu Kovalima prende sigaru ho montante 398 ball neebe suspeitu sira hatama ilegal tama teritoriu nasional Timor Leste. Sasan kontrabandu hanesan mos DSIK halo apreensaun iha fulan Jullu no Agostu 2025 ho montante 900 ball no 600 ball,” hatete Portavoz Mouzhino Correia liuhosi Konferensia Imprensa neebe realiza iha Sala Multimedia Servisu Migrasaun, Ministeriu Interior, Kaikoli, Dili, Kinta (16/10/2025).
Portavoz Mouzinho Correia neebe akompanha husi Koordenador Gabinete Seguransa ba Ministerio Interior, Moises da Silva no Inspector Xefe Serbisu Migrasaun, Vicente Gusmao, hateten ema hatama ilegal sasan kontrabandu sira nee, tamba linha fronteira neebe luan no rekursu umanu limitadu atu kontrola movimentu ema no sasan sira tama no sai ilegal liuhosi fronteira ka dalan laho nian.
Nia mos relata katak iha loron 11 Outubru 2025 PNTL liu hosi DSIK halo intervensaun krime explorasaun jogos illisita (online game) hodi halao detensaun ba ema nain 10 hosi sidadaun estranjeiru feto no mane. Hafoin aprezenta ba Tribunal Distrital Dili ba primeiru interrogatoriu, Tribunal aplika mediadaun koasaun aprezenta perirodika.
Relasiona ho video neebe viral iha media sosial iha semana hirak liu ba kona-ba membru PNTL neebe fo kilat ba ema sivil tiru, Portavoz Mouzhino hatete katak, kazu nee Polisia identifika ona membru PNTL nee no sidadaun estrajeiru nain rua (2) neebe uza arma PNTL hodi koko tiru iha kampu tiru iha Kaitehu, Likisa (Membru PNTL ho inisial MTJ DR, YSP alias J no SD) NUC: 0313/25. PNSIK.
Komando Jeral PNTL mos fo ona sansaun disiplinar ba membru PNTL neebe tiru nia kaben ho inisial JLO. Enkuantu prosesu kriminal mos lao ona. NUC 0324/25 PNSIK.
Polisia halo detensaun Flagrante delicto no aprezenta ba PI no TJPI Dili aplika medida koasaun aprezentasaun periodika 2 kada semana.
Tuir Portavoz Mouzinho, insidente barak liu akontese iha area Munisipiu Dili, tuir fali Oecusse-Ambeno no Bobonaro. Hosi 12 insidente hamosu 131 auto krime no krime as liu iha semana dahat (28/09-12/10/2025) mak hanesan, ofensa ba integridade fizika simples 39, maus tratus ba konjuje 22, ameasa 13, danu simples 7 no violasaun 5.
Nunee mos asidente trafiku sira iha 104 asidente trafiku neebe akontese iha teritoriu nasional Timor Leste, rezulta ema nain 6 mate, 22 kanek todan no 123 kanek kaman.
Jornalista: Mikael Mali Mau
Editor: Mikael Mali Mau
