DILI, STLTIMORLESTE.com – Embaixador Japaun ba Timor Leste, KIMURA Tetsuya hamutuk ho Ministra Edukasaun, Dulce de Jesus Soares, Prezidente Autoridade Munisipiu Likisa no funsionariu relevante sira seluk, inaugura Eskola Pre-Sekundaria Maubara iha Munisipiu Likisa.
Serimonia inaugurasaun Eskola Pre-Sekundaria Maubara neebe ho asina plaka husi Ministra Edukasaun, Dulce de Jesus Soares no Embaixador Japaun ba Timor Leste, KIMURA Tetsuya nee halao iha loron Kinta (16/10/2025).
Tuir komunikadu imprensa neebe STL simu iha loron Sesta (17/10/2025), serimonia nee organiza husi Fundasaun Hadia Dezenvolvimentu Ekonómiku Rurál (HADER), ONG lokál neebé implementa projetu nee, ho partisipasaun husi nia pesoál no membru komunidade sira.
Embaixadór Kimura Tetsuya iha ninia diskursu hatete, Japaun mós rekonhese kleur ona edukasaun nuudar pilar fundamentál dezenvolvimentu nian.
“Ami konstrui ona edifísiu eskola liu 40 partikularmente iha área rurál iha nasaun tomak no ami hein katak projetu sira-nee sei lori mudansa pozitivu no sustentável signifikativu ba povu no labarik sira nia moris iha Maubara,” dehan Embaixador KIMURA.
Iha komunikadu imprensa nee mos relata valor projetu ida nee, Governu Japaun fornese USD 72,992 liuhosi nia eskema Subvensaun Asistensia ba Projetu Seguransa Umanu iha Baze (GGP).
Edifísiu eskola foun iha Maubara, Suku Vaviquinia hein katak bele kria ambiente edukasaun neebé seguru no ikus mai hasae kualidade edukasaun iha área refere.
Tuir komunikadu nee, dezde lansamentu projetu dahuluk iha tinan 2000, projetu hamutuk 146 maka implementa ona tuir eskema GGP iha munisípiu 12 hotu-hotu no RAEOA Timor-Leste nian. Projetu sira-nee suporta liu-liu hadiak sira ba infra-estrutura komunidade nian, inklui konstrusaun no reabilitasaun ba instalasaun sira eskola nian, postu saúde sira, no sistema fornesimentu bee nian, hodi hatán ba nesesidade umanu báziku oin-oin iha baze.
Jornalista: Mikael Mali Mau
Editor: Mikael Mali Mau
