BAUKAU, STLTIMORLESTE.com – Diresaun Nasional Prevensaun Konflitu Komunitaria (DNPKK) halao dialogu ho komunidade sira iha Suku Tirilolo, Postu Administrativu Baukau Vila, Munisipiu Baukau.
Diretora Dirasaun Nasional Prevensaun Komflitu Komunitaria, Lídia Carvalho esplika, dialogu refere realiza iha Suku Tirilolo, tanba hakarak intrudus lejislasaun direitu nain ba rai, lei regular arte marsiais inklui lei kontra violensia domestika. Aliende dialogu nee mos atu hametin relasaun DNPKK nian ho Autoridade Suku nunee hasae konsensia komunidade harii dame iha sosiedade, tanba tuir dadus ba komflitu rai neebe mediador sira rekoilha aas liu kazu seluk iha Timor.
“Se ida nee ita la halo prevensaun la fasilita dialogu no ita la halo aprosimasaun ba sira atu rezolve nee bele lori sira ba dalan krime, ezemplu foin lalais iha Baukau ita akompanha familia rasik oho malu tanba rai,” hateten Lídia ba jornalista sira, hafoin remata abertura dialogu, iha Suku Tirilolo, Sesta (17/10/2025).
Nia sublina, kazu neebe DNPKK rejistu iha Munisipiu Baukau aas mak kazu disputa rai, komfrontu entre jovem sira no violensia domestika.
Tanba nee DNPKK foti inisiativa kobre Suku sira hodi dialogu ho komunidade sira nunee preve kazu sira no motiva komunidade sira kria pas no estabilidade iha kada Suku.
“Ami nia esperansa kona-ba dialogu komunitariu ida nee ami komvida orador bazeia ba dadus bele mai aprezenta ba komunidade sira,” Lídia katak.
Iha fatin hanesan, Xefe Suku Tirilolo Elvino Freitas Belo konsidera, dialogu refere importante, tanba liu husi dialogu bele fo hanoin ba jovem sira hodi prevene konflitu sira.
“Kona-ba kazu krime la rejistu iha Suku, maibe kazu Sivil iha 2024 rejistu 13, 2025 ami rejistu tan 4 kona-ba kazu sivil disputa rai,” Elvino informa.
Tuir Autoridade Suku nee katak, durante tinan 2 Suku Tirilolo rejistu kazu disputa rai hamutuk 17 no konsidera futuru bele hamosu krime, tanba nee prezensa DNPKK intrudus lejislasaun sira ba komunidade hodi komprende evita kazu sivil iha Suku Tirilolo, maibe husi kazu 17 refere durante nee parte Suku konsege rezolve tuir familia.
Entretantu dialogu nee hetan partisipasaun masimu husi komunidade sira husi Suku Tirilolo.
Jornalista: Tomas Reis
Editora: Carme Ximenes
