BAUKAU, STLTIMORLESTE.com – Iha loron 17 Outubru 2025 parte loraik nee mosu asidente iha estrada publiku diresaun Baukau-Kelikai iha area Aldeia Mumana, Suku Abafala, Postu Administrativu Kelikai, Munisipiu Baukau, rezulta motorista nain 2 kanek greve.
Tuir informasaun neebe STL asesu, asidente nee involve husi motor 2 mak hanesan motor mio beat kor metan no motor supra X kor metan, iha neebe motor mio beat metan konduz husi sidadaun ida la tula pasajeiru diresaun husi Postu Administrativu Kelikai no supra X konduz husi Arjino Pinto tula pasajeiru ida nuudar familia no sira nain 2 sidadaun Suku Afaloikai, Postu Administrativu Baguia, husi Baukau atu ba Afaloika Baguai liu husi Kelikai, maibe iha area Mumana Abafala hetan asidente.
Husi asidente nee Arjino Pinto nuudar motorista husi motor Supra X hetan kanek grave no motorista husi motor mio beat refere mos hetan kanek grave, enkuantu pasajeiru husi motor supra X kondisaun kanek kmaan.
Hafoin hetan asidente, sidadaun nain 3 refere transporta ho kareta multi funsaun no ambulansia too ona sala emerjensia Hospital Rejional Eduardo Ximenes (HoREX) Baukau hodi hetan asistensia husi mediku sira.
Tuir observasaun STL nian iha terenu nota katak, familia husi sidadaun nain 3 refere too ona iha sala emerjensia HoREX Baukau no parte Polisia Tranzitu husi Komando Polisia Munisipiu Baukau hahu rekolha informsaun ba asisdente refere.
Jornalista: Tomas Reis
Editor: Xisto Mendonça
