BAUKAU, STLTIMORLESTE.com – Asindente trafiku neebe akontese iha estrada publiku diresaun Baukau-Kelikai area Aldeia Mumana, Suku Abafala, Munisipiu Baukau, neebe ema nain 2 nuudar motorista hetan kanek todan, tanba nain ida seluk kondisaun lanu.
Segundu Komadante Polisia Munisipiu Baukau, Superintendente Asistente Fasiu de Jesus Lima esplika, asidente refere akontese iha loron 17 Outubru 2025 parte loraik tuku 15:30, involve husi motor Supra X kor metan sapa matrikula N.7755 konduz husi Arjino Pinto idade 28 tula pasajeiru Elias Menezes idade 32 diresaun husi Baukau Vila atu ba Suku Afaloikai, Postu Baguia, foti diresaun Kelikai no too iha area Mumana, Suku Abafala hetan asidente, tanba soke malu ho motor Mio beat kor metan sapa matrikula U.0552 konduz husi Denis Soares idade 20 diresaun husi Kelikai-Baukau.
“Motivu husi asidente nee akontese tanba morista Arjino Pinto kondus motor Supra X kondisaun lanu, tanba hemu tua mutin halai zig-zag halai okupa motor mio beat metan nia dalan mak akontese soke malu,” informa Superintendente Asistente Fasiu de Jesus Lima ba jornalista sira iha knaar fatin Vila Nova Baukau, Segunda (20/10/2025).
Nia sublina, hafoin asindete parte Polisia Munisipiu Baukau too kedas fatin no transporta sidadaun nain 3 refere ho kareta multi funsaun no ambulansia ba Hospital Rejional Eduardo Ximenes (HoREX) Baukau hodi halo tratamentu saude, tanba Arjino Pinto hetan kanek nakles iha ren toos parte karuk rezulta raan sai husi inus no Denis Soares hetan kanek iha matan fukun parte karuk suku pontu 6 no kanek mos iha kakorok parte loos, enkuantu Elias Menezes hetan kanek kmaan iha hasan parte loos.
Nia fundamenta, kanek neebe sidadaun nain 3 sofre, nain 2 nuudar motorista hanesan Denis Soares no Arjino Pinto daudaun sei halo tratamentu, tanba konsidera hetan kanek todan no prosesu ba asisdente refere parte Komando Polisia Munisipiu Baukau seidauk rejistu iha Ministeriu Publiku, tanba seidauk hetan informasaun husi motorista nain 2 refere.
“Evidensia hirak nee agora asegura iha edifisiu Komando Polisia Baukau no kazu temporariamente sei iha faze investigasaun tanba vitima sira sei hetan hela tratamentu,” Superintendente Asistente Fasiu de Jesus Lima akresenta.
Tuir informasaun neebe STL asesu husi HoREX iha loron 18 Outubru 2025 parte pasiente nain 2 hanesan Arjino Pinto no Denis Soares iha sala emerjensia HoREX Baukau liu husi Ambulansia tranfere ona ba HNGV Dili hodi kontinua halao tratamentu saude, tanba kondisaun grave.
Entretantu evidensia hanesan motorizada 2 kompostu motor Supra X ni mio beat Komando Polisia Munisipiu Baukau liu husi ekipa tranzitu asegura ona iha edifisiu Komando Polisia Baukau.
Jornalista: Tomas Reis
Editor: Xisto Mendonça
