BAUKAU, STLTIMORLESTE.com – Komando Polisia Munisipiu Baukau bolu ona joven nain 6 ba kazu agresaun fiziku hasoru Padre Juvinal Gusmão iha Aldeia Mukububu, Suku Lakuliu, Postu Administrativu Kelikai, Munisipiu Baukau.
Segundu Komadante Polisia Munisipiu Baukau, Superintendente Asistente Fasiu de Jesus Lima esplika, kazu refere akontese iha loron 12 Outubru 2025 parte madrugada, maibe iha loron refere Komando Polisia Munisipiu Baukau la konsege halo identifikasaun, tanba vitima ba halao misaun pastoral nian iha Munisipiu Lautem, nunee iha loron 15 Outubru nee Komando Polisia Munisipiu Baukau liu husi Polisia Eskuadra Postu Kelikai identifika ona joven nain 6 ba kazu refere.
“Iha Kuarta-feira ita fo ona atendimentu ba Amu foti ona nia informasaun, husi informasaun nee ita nia Amu la hateten loos se mak involve tanba la konhese iha tempu neeba kalan, maibe iha informasaun balu Amu fo liga ho fatin akontesimentu ita konsege lori ita nia juventude nain 6 hanesan nee hodi halao identifikasaun,” informa Superintendente Asistente Fasiu de Jesus Lima ba jornalista sira iha knaar fatin Vila Nova Baukau, Segunda (20/10/2025)
Nia sublina, joven nain 6 neebe Komando Polisia Munisipiu Baukau bolu halo identifikasaun daudaun kontinua sei iha prosesu laran no seidauk bele fo sai rezultadu, maibe deklarasaun neebe vitima Padre Juvinal Gusmão presta iha edifisiu Komando Polisia Munisipiu Baukau, vitima rasik lakohi atu prosesu kazu refere ba oin, maibe hakarak autor sira nia onestidade ba kazu refere.
“Amu dehan atu fo perdaun deit la lori prosesu nee atu ba oin, tanba tuir ita nia kodigu penal katak ofensa integridade fizika simples husi kazu semi publiku depende ba keixa, kuandu nia keixa maibe ikus mai nia dada nee kompetensia ninian,” Superintendente Asistente Fasiu de Jesus Lima.
Entretantu joven nain 6 neebe Komando Polisia Munisipiu Baukau bolu halo identifikasaun ba kazu tebe Padre Juvinal Gusmão, Komando la fo sai nia identidade, tanba segredu justisa.
Jornalista: Tomas Reis
Editor: Domingas Gomes
