DILI, STLTIMORLESTE.com – Ministeriu Edukasaun (ME) liu husi Servisu Edukasaun Munisipiu (SEM) Dili halao abertura ezame nasional iha Ensinu Baziku Central (EBC), Manleuana, Dili.
Diretor EBC Manleuana, Carlos Correia dehan, tuir lo-loos iha abertura nee SEM Dili ho PAM mak mai, maibe tanba PAM ba fali enkontru nee mak Diretor Edukasaun deit mak mai.
“Ohin SEM Dili mai halo abertura ezame nasional iha EBC Manleuana. Tuir lo-loos Ministra mak atu mai, maibe tanba Ministra ba fali iha Munisípiu neebe delega fali Diretor Edukasaun Dili mak mai,” dehan nia jornalista STL iha Manleuana, Segunda (20/10/2025).
Carlos dehan, dader tuku 7:00 nee hahu abertura ona, para estudantes sira tama iha sala de aula hodi partisipa iha ezame nasional. Ohin loron dahuluk ezame nasional nee ba materia matematika no lingua português, kada materia ida ezame han oras rua ho balun. Total estudantes neebe partisipa iha ezame nasional nee hamutuk 253.
“Vizilantes sira nee mai husi Eskola Fatumeta, sira hamutuk 26, ami nian estudantes kada sala 20, sala neebe ami nian estudantes sira utiliza hamutuk 13, aban kontinua ezame nasional nafatin,” tenik nia.
Nunee mos Diretor Servisu Edukasaun Munisipiu Dili, Sabino da Costa Pereira husu ba estudantes sira prienxe perguntas nee resposta ho diak, atu nunee labele lakon oportunidade. Segundu husu profesores vizilansia sira halo kontrola ba estudantes sira, atu nunee estudantes sira partisipa iha ezame nee ho diak no prienxe ho kuidadu. Labele ansi sai sedu, sai tuir oras neebe termina ona.
Entretantu Maria Barreto hanesan estudante dehan, ohin loron hanesan loron dahuluk neebe estudantes sira partisipa iha ezame nasional no estudantes sira ba sedu eskola, tanba nee laos loron baibain maibe nee ezame nasional neebe tama sala tuir oras.
Jornalista: Jacinta Sequeira
Editora : Domingas Gomes
