DILI, STLTIMORLESTE.com – Jeneral Reformadu Lere Anan Timur vizita fatin Istoriku iha Tasi Fatin Soibada, Manatutu, iha vizita nee fo apoiu sosial ba komunidade sira.
Asesor Polítiku Prezidensial, Jeneral (Reformadu) Lere Anan Timur, halao vizita ida ba Tasi Fatin, Soibada, iha loron 18 Outubru 2025, iha okaziaun ba Peregrinasaun Nasional ba Santusriu Beata Imaculada Conceição, Virjen Aitara.
Tuir Komunikadu neebe STL asesu husi Media Prezidente Republika, Segunda (20/10/2025) hatete, deslokasaun nee iha karater simboliku neebe klean, tanba Jeneral fila-fali ba fatin neebe durante períodu rezistensia, serve hanesan subar fatin estratejiku ida ba nia.
Hodi hatudu ninia kompromisu kontinuadu ba povu, Jeneral Lere Anan Timur lori apoiu sosial ba komunidade Tasi Fatin, fahe direitamente ba família lokal sira, nesesidade esensial sira inklui sapatu, roupa, manta no vitamina ba labarik sira, hodi responde ba nesesidade imediatu iha komunidade remota nee.
Iha dialogu ho rezidente sira, Jeneral sublina ninia hakarak atu prezerva fatin nee nuudar fatin istoriku ofisial ida, neebe sei proteje no valoriza husi jerasaun futura sira.
Komunidade simu ho diak vizita nee no aproveita oportunidade hodi hatoo mos sira nia preokupasaun, liu-liu kona-ba nesesidade urjente atu hadia asesu ba estrada. Interasaun nee fo sai importansia atu hanoin hikas memoria istoria nasaun nian hanesan esforsu kontinua ba moris diak povu Timor nian.
Jornalista: Emerenciana Pinto
Editor: Domingas Gomes
