DILI, STLTIMORLESTE.com – Tribunal Rekusu (TR) hasai ona desizaun kona-ba rekursu neebe hatama husi Ministeriu Publiku hasoru arguidu CMX, neebe komete krimi kontra lezadu inisial JCXB iha Indonezia.
Kazu refere iha alegasaun, antes nee Prokurador ba prosesu, Domingos Barreto husu Tribunal atu kondena arguidu pena efetivu iha Prizaun tinan 4 fulan 6.
Enkuantu Defensora Publika Laura Valente husu Tribunal atu absolve arguidu.
Ikus mai iha faze desizaun, Tribunal Koletivu kompostu husi Juiz Prosesu Fransisca Cabral, deside hodi aplika pena suspensaun ba iha arguidu.
Ho desizaun Tribunal Primeira Instansia nian, Prokurador ba prosesu Domingos Barreto la aseita ho desizaun, tuir prazu neebe iha durante loron 30 prokurador halo rekursu ba iha Tribunal Rekursu, no husi rekursu nee aprezenta mos kona-ba saida mak Prokurador sita ona iha alegasaun, tanba kazu refere lezadu nia liman sorin hetan taa no monu ketak.
Ikus mai Tribunal Rekursu haree rekursu neebe aprezenta husi MP, no TR afavor ba MP nian rekursu, hodi diminui tiha fulan 6, maibe deside aplika pena prizaun efetivu tinan 4 ba arguidu.
Antee nee Tribunal Primeira Instansia julga arguidu no lee sai faktus katak, iha Kinta Feira Santa dia 28 Marsu tinan 2013 oras tuku 00h15 oras Indonesia nian, lezadu JCXB ho nia kolega AMA foin sai husi misa depois ba sosa hahan besik Indomart, besik jalan Blimbing Indonesia derepente arguidu CMX ho suspeitu FG hamutuk ho sira nia kolega kuaze nain 12 nunee, sae motorizada neen no hare hetan lezadu no testamuna.
Momentu nee lezadu no testamuna rona arguidu sira hakilar dehan, sira nain rua maka neeba, nunee arguidu ho suspeitu no kolega sira seluk fila motorizada mai ta lezadu no testamuna.
Lezadu no testamuna hare arguidu sira seluk kaer katana, samurai no tudik iha liman, taka oin ho maskra maibe arguidu no suspeitu maka la taka sira nia oin, lao ba tan lezadu no testamuna.
Ho ida nee lezadu ho testamuna halai fahe malu, lezadu halai tuir estrada, no testamuna halai ba area Kampus Universitas Widyagama Malang Indonezia.
Arguidu ho suspeitu ho nia kolega sira hamutuk duni lisuk lezadu, banhira toman lezadu arguidu no suspeitu ho kolega sira nee haleu kedan lezadu, no lezadu rona arguidu maka koalia dehan hasai tiha nia kakorok.
Nunee suspeitu FG lori kedan samurai ta lezadu nia kakorok sorin karuk, hafoin arguidu lori katana taa tan lezadu nia kotuk laran, rezulta kanek mean, suspeitu lori samurai taa tan lezadu nia ulun, maibe lezadu lori liman karuk tahan samurai nee rezulta lezadu nia liman sorin karuk kotuk kedas. Ho ida nee arguidu hateten ba suspeitu katak, Nando nia liman kotuk ona ita halai ona.
Tuir mai arguidu suspeitu ho nia maluk sira nee halai husi fatin neeba, no lezadu hasai nia faru hodi bobar fali nia liman nee, no husik hela liman kotu nee iha fatin akontesementu.
Ho kanek nee lezadu tenke halai ba iha nia hela fatin kos hodi husu ajuda ba nia kolega Antonio, hafoin transporta ba Hospital Syaiful Anwar Malang Indonesia hodi halo tratamentu intensivu, tuir mai kolega Antonio ho Polisia ba iha fatin akontesementu hodi foti lezadu nia liman.
Arguidu nia konduta nee lezadu hetan kanek iha kakorok, sorin karuk, kotuk laran, liman kabun sorin karuk no tenke lakon liman sorin karuk.
Arguidu no suspeitu hamutuk ho sira nia kolega pratika tiha aktus sira nee hasoru lezadu iha nasaun Indonezia, depois halai mai Timor hodi hases an husi Justisa, Polisia Indonesia difsil atu hetan sira.
Arguidu halo hahalok sira nee ho livre deliberada no konxiente, tau hanoin ba forsa ida deit, tuka malu ho motorizada kaer samurai katana tudik hodi duni lezadu toman haleu kedan lezadu no arguidu koalia ba suspeitu atu haruka hasai lezadu nia kakorok, lori samurai no katana ta iha kakorok, kotuk laran, liman kabun sorin karuk, taa iha ulun maibe lezadu lori tahan, hodi liman sorin karuk kotu.
Arguidu hatene momos hahalok hirak nee lei bandu no hetan kastigu.
Tanba nee Ministeriu Publiku akuza arguidu hanesan ko autor material ba krime Omisidiu Simples ho Forma Tentada previstu iha artigu 23,24,138 husi Kodigu Penal.
Audensia julgamentu nee, Prezide husi Juiz Koletivu, Juiz Prosesu Fransisca Cabral, Ministeriu Publiku reprezenta husi Prokurador Domingos Barreto, arguidu hetan asistensia legal husi Defensora Publika Laura Valente.
Jornalista: Terezinha De Deus
Editora: Domingas Gomes
