DILI, STLTIMORLESTE.com – Kondenadu nain 2 ho naran Elvis Mendonsa Pereira no Agidio Alves hetan liberdade kondisional husi Tribunal Judisial Primeira Instansia Dili (TJPID).
Liu husi julgamentu Segunda (20/10/2025), Juiza prosesu Jumiati Freitas deklara, tuir lei kondenadu sira atu hetan liberdade kondisional sei konfirma ba sira konaba, atividade neebe durante sira iha, no sira nia planu banhira sai iha liur sei halo saida.
Iha sala julgamentu laran, kondenadu Elvis Mendonsa Pereira deklara katak, kondenadu komete krime ofensa integridade fisika grave maka ikus mai kondenadu tama iha prizaun.
Kondenadu deklara, kastigu neebe kondenadu hetan tinan lima iha prizaun, kumpri ona tinan 2 fulan neen, kompleta ona metada da pena.
Tribunal konfirma konaba iha Prizaun halao deit atividade saida, kondenadu deklara iha prizaun tuir formasaun konaba lee biblia, kontrola hirus, karpintaria, no iha moa cozina. Durante iha prizaun la iha sansaun disiplinar ruma.
Kondenadu deklara, banhira sira husi prizaun lao ba iha fatin ruma maka hetan vitima, nia nain rasik sei bolu vitima hodi koalia ba vitima katak, ami nia sala ami kumpri ona, husu deskupa atu ba oin ida idak halao nia moris.
Kondenadu arepende tebes ho nia hahalok nee, karik iha liu maka ema ruma buka problema ho kondenadu, nia sei halai ses hodi aprezenta ba iha autoridade seguransa. Kondenadu mos promete, sai husi Prizaun sei buka servisu hodi ajuda tau matan ba inan neebe faluk.
Alende nee Kondenadu Agidio Alves Tribunal mos konfirma ba nia, no deklara arepende ona hahalok nee, no iha Prizaun kondenadu nia fen kontinua ba vizita tanba nee sai husi Prizaun sei fila ba sira nia uma, buka servisu tau matan ba oan sira.
Tribunal mos deklara ba kondenadu nain rua katak, sira nain rua kumpri ona prizaun tinan 2 fulan neen, hela tinan rua fulan haat, tanba nee durante periodu tinan 2 fulan haat nia laran labele halo krime.
Se halo krime foun, Tribunal sei halo revogasaun hodi ba kumpri restu husi pena tinan rua fulan haat iha Prizaun, hodi hein julgamentu ba kondenasaun prosesu foun nian.
Alende nee Prokurador Antonio Tavares, no Advogadu Marinho da Cruz, husu ba kondenadu nain rua atu sai ba iha liur, hatudu ezemplu neebe diak ba komunidade sira, no buka servsiu hadok an husi problema.
Juiz prosesu liu husi audisaun neebe iha, Juiz deside liberdade kondisional ba kondenadu nain rua, tanba kumpri ona metade da pena neebe maka iha.
Jornalista: Terezinha De Deus
Editora: Domingas Gomes
