DILI, STLTIMORLESTE.com – Tribunal Judisial Primeira Instansia Dili (TJPID) halao primeira julgamentu ba kazu neebe akontese iha Beduku envolve husi arguidu AdD, no ikus mai rezulta vitima Isac Soares lakon vida.
Tuir faktus neebe le sai husi Tribunal Segunda (20/10/2025) katak, iha loron, 28 fulan Fevereiro tinan 2025 por volta 8h00 dader, fatin iha Beduku, Tibar Likisa vitima Isac Soares hanesan chefe ekipa halo moru kompaña Joni Ze, duun ba arguidu naok teen no tolok nia inan aman.
Arguidu ho vitima diskute malu hodi hadau malu besi ulir no arguidu mak foti duni besi hodi baku dala ida iha vitima nia ulun hetan kanek no monu ba rai, arguidu mos halai husi fatin akontesimentu nee.
Testemunha Joni Soares haree ema halai, tanba nee nia mos ba iha fatin akontesimentu hodi haree vitima monu hela ba rai hetan kanek ulun no mos rai sai, tanba nee mak sira hein ambulansia hodi mai foti vitima ba iha Ospital, maibe labele salva nia vida.
Konsekuensia hosi arguidu baku nee halo vitima hetan kanek grave iha ulun, halo raan sai barak hodi kauza lakon vida.
Arguidu halo agresaun hasoru vitima, tanba vitima dun nia naok teen no tolok nia inan aman.
Arguidu hatene katak bainhira lori besi baku vitima nia ulun bele kauza kanek grave no raan sai barak hodi rezulta nia mate. Maibe arguidu halo nafatin saida mak nia hakarak.
Arguidu halo krime ho livre, deliberada, konsentemente no hatene katak hahalok nee proibidu no hetan pena tuir lei tanba nee konsidera arguidu hanesan autor material ba krime omisidiu simples previstu tuir artigu 138 husi kodigu penal.
Hatan ba akuzasaun neebe iha arguidu deklara katak, moentu neeba arguidu ho vitima diskuti malu tanba projeitu, no arguidu ho vitima hadau malu besi kanu ida, matebian tuku uluk arguidu hodi monu ba rai.
Arguidu deklara, monu tiha ba rai arguidu hare hetan besi ida, no arguidu hader mai foti besi nee baku dala ida ba iha vitima, no vitima monu liu.
Arguidu deklara tan, depois vitima monu tiha arguidu la hatene vitima mate ka lae, tanba tauk arguidu halai kedan iha eskuadra Polisia.
Rona tiha arguidu, Tribunal hare katak arguidu konfesa imparsial ba faktus neebe iha, tanba nee husu Ministeriu Publiku atu tama kedan ba iha faze alegasaun.
Iha alegasaun nee Prokurador Nelson Magno, husu Tribunal atu aplika pena Prizaun ba iha arguidu.
Enkuantu parte defeza, Advogadu Fernando da Costa husu Tribunal, atu kondena arguidu ho pena prizaun menus husi tinan walu, tanba arguidu konfesa imparsial ba faktus.
Rona tiha alegasaun, Tribunal adia ba loron seluk hodi rona leitura akordaun.
Audensia julgamentu nee, prezide husi Juiz, Fransisca Cabral, Jose Escurial, Juiz estajiadu nain ida, Ministeriu Publiku reprezenta husi Prokurador Nelson Magno, arguidu hetan asistensia legal husi Advogadu Privadu Fernando de Carvalho.
Jornalista: Terezinha De Deus
Editora: Domingas Gomes
