DILI, STLTIMORLESTE.com – Relasiona ho kazu Roo Haksolok neebe sai polemika iha publiku, kazu nee daudaun iha hela Ministeriu Publiku, faze investigasaun too ona 70%, hela 30%.
Tuir Prokurador Jeral Republika, Nelson De Carvalho katak, prosesu Roo Haksolok bele dehan prosesu ida neebe kompleksu, maibe iha faze investigasaun nian atinji ona 70%.
“Hau bele dehan katak faze investigasaun iha ona 70%, hela 30%,” dehan PJR ba jornalista sira hafoin remata audensia publika orsamentu Prokuradoria Jeral Repúblika tinan 2026 iha Parlamentu Nasionál, Segunda (20/10/2025).
Hatan kona-ba presiza konklui tan faktus balu, PJR dehan, ida nee Prokurador Titular nia servisu, maibe PJR iha informasaun kona-ba nee.
Nia esplika, husi Roo Haksolok mosu tan faktus neebe mak iha, no iha tan buat balun husi kazu nee, no prosesu nee hamosu tan kazu balun.
PJR afirma, nia parte labele esplika kona-ba ema nain hira mak envolve iha kazu nee, tanba sei iha faze investigasaun.
Iha fatin ketak, Jurista Sergio Dias Quintas husu Ministeriu Publiku atu tau prioridade ba kazu Roo Haksolok.
“kazu Roo Haksolok sai polemika iha ita nia sosiedade, tanba nee MP nuudar titular ba asaun penal ita hotu enkoraja MP atu tau prioridade ba kazu Roo Haksolok, atu rezolve lalais kazu Roo Haksolok nee,” dehan Jurista Sergio.
Jornalista: Terezinha De Deus
Editor: Xisto Mendonça
