BAUKAU, STLTIMORLESTE.com – Loron daruak ezame nasional iha Munisipiu Baukau, estudante hamutuk nain 9 la partisipa tanba moras.
Diretor Servisu Munisipal Edukasaun Baukau, Afonso dos Santos da Costa informa, total estudante husi terseiru siklu no sekundaria neebe partisipa iha ezame nasional anu letivu 2025 hamutuk rihun 5 resin, husi total estudante rihun 5 resin la partisipa iha ezame nasional loron daruak nian, tanba moras.
“Informasaun neebe ohin ami rekoilha husi diretiva eskola sira no tekniku sira nain 9 mak la partisipa, tanba moras, sira nee balu horseik tuir oin mak la tuir, balun la tuir iha loron dahuluk nian,” Afonso relata ba jornalista sira, iha Buruma, Tersa (21/10/2025).
Nia hatutan,husi estudante nain 9 neebe la tuir ezame nasional nee balu la tuir iha loron dahuluk no balu la tuir iha loron daruak, maibe sei tuir hikas segundu emisaun, tanba hafoin estudante nain hirak nee la prezensa iha sala ezame parte diritiva eskola sira too kedas fatin haree no observa estudante hirak nee kondisaun moras.
No estudante nain 9 nee kompostu feto nain 6 no mane nain 3 no rejistu husi eskola Katolika Sagrada Kurasaun de Jesus Vila Nova Baukau, eskola Berecoli no Vemasi.
“Iha informasaun Postu 3 husi Vemasi, Baukau Vila no Venilale, Postu seluk ita seidauk iha informsaun, maibe sira iha oportunidade tuir fali iha ezame iha segundu emisaun,” Afonso akresenta.
Diretor Servisu Munisipal Edukasaun Baukau nee deklara, ezame nasional ba loron dahuluk no daruak iha Munisipiu Baukau lao diak, tanba iha kooperasaun diak ho lideres komunitariu sira no hetan akompanhamentu parte Seguransa nian iha terrenu.
Iha fatin hanesan responsavel eskola terseiru siklu Buruma, David Morais da Silva informa, ezame nasional anu letivu 2025 iha eskola terseiru siklu filial Buruma lao diak, tanba estudante finalista sira partisipa hotu iha ezame refere.
“Ami nia estudante tuir ezame nasional loloos nain 50, maibe ida destinu ona entaun hela 49 pesoas iha sala 3, sala 2 kada sala ema nain 20 no sala ida nain 9,” David informa.
Entretantu total estudante husi Munisipiu Baukau rihun 5 resin mak hanesan, husi ensinu baziku terseiru siklu kompostu mane 1.344 no feto 1.315 akumula iha sentru exame 42, estudante sekundaria husi eskola 23 akumula iha sentru ezame 23 no estudante husi eskola tekniku vokasional 5 sei akumula iha sentru ezame 5.
Jornalista: Tomas Reis
Editora: Carme Ximenes
