DILI, STLTIMORLESTE.com – Membru Polisia Nasional Timor Leste (PNTL) husi Munisípiu Ainaro apoiu Servisu Edukasaun Munisípiu refere, hodi halo seguransa ba ezame nasional iha eskola sira.
Liafuan nee hatoo husi Diretor Servisu Edukasaun Munisípiu Ainaro, Patricio da Costa Magno ba STL liu husi telefoni, Tersa (21/10/2025).
Nia dehan, ezame nasional iha eskola sira iha Munisipiu Ainaro, komesa iha dia 20 too ohin 21, iha Ainaro ezame lao normal hanesan bai-bain.
“Ohin loron daruak ba EN iha postu hat too agora ezame lao diak hela, situasaun lao normal, tanba apoiu husi Komandante PNTL Munisípiu Ainaro haruka membru PNTL halo patrolha iha Ainaro Vila nomos iha postu 4 nee,” nia haktuir.
Nia hatutan, tanba SEM Ainaro fo karta antes ona ba PNTL Munisípiu Ainaro, ho nunee sira bele apoiu seguransa. Sira halo patrolia ba eskola sira, tanba nee situasaun seguransa ba ezame nasional iha eskola sira lao diak hanesan baibain.
“Total ami nian estudantes neebe mak partisipa iha ezame nasional ba tinan ida nee hamutuk 2000 resin. Nee husi nibel ensinu baziku, ensinu sekundariu no ensinu tekniku vokasional,” dehan nia.
Nia hatutan, ezame nasional halao horseik too agora lao diak, no situasaun seguransa iha eskola hakmatek no lao diak hanesan baibain.
Iha fatin seluk Diretor Servisu Edukasaun Munisípiu Vikeke, Julio Sacadura, B.ed hatete, horseik loron primeiru ba ezame nasional nee iha estudantes 15 mak la partisipa iha ezame refere, maibe balun sei moras no tuir fali iha Segunda feira oin mai.
Jornalista: Jacinta Sequeira
Editora: Domingas Gomes
