DILI, STLTIMORLESTE.com – Tribunal Judisial Primeira Instansia Dili (TJPID) halao primeiru interogatoriu ba arguidu ho inisial MDS, tanba deskonfia komete krimi Arma Branka.
Arguidu lori mai iha Tribunal, no parte Ministeriu Publiku nian promove arguidu ho krimi rua, Arma Branka no krimi Ofensa Integridade Fizika Simples.
Iha sala laran, Juiz estajiadu halo tiha indentifikasaun ba arguidu, no husu Ministeriu Publiku (MP) atu tama ba iha alegasaun. Iha alegasaun nee MP neebe reprezenta husi Prokurador, Napoliao da Silva, husu Tribunal atu aplika medida Aprezentasaun Periodika (AP) ba arguidu.
Enkuandu Defeza husi arguidu nian, Manuel Amaral aseita ho pedidu MP nian, atu segura arguidu durante prosesu investigasaun nia laran.
“Arguidu konfirma ba faktus neebe iha, no prosesu primeiru interogatoriu nee Tribunal hare hodi deside deit medida saida maka sei aplika ba arguidu, hodi hein prosesu investigasaun,” dehan Defeza Manuel Amaral.
Tuir nia, medida neebe todan liu maka medida Prizaun Preventiva (PP) no Medida neebe kaman liu maka medida TIR (Termu Indentidade Rezidensia).
Rona alegasaun Tribunal adia ba loron 21 oras tuku 5 loraik, hodi rona despaisu.
Prosesu nee, prezide husi Juiz estajiadu nain ida, Ministeriu Publiku reprezenta husi Prokurador, Napoliao da Silva, arguidu hetan asistensia legal husi Defensor Publiku, Manuel Amaral.
Tuir kronolojia katak, kazu nee akontese iha aldeia Kasnafar, Suku Dare, iha loron 19 fulan nee. No arguidu lori mai iha Tribunal hatais ropa detidu, akompanha husi autoridade seguransa.
Jornalista: Terezinha De Deus
Editora: Carme Ximenes
