DILI, STLTIMORLESTE.com – Vise Ministru ba Fortalesimentu Institusionál Saúde, José dos Reis Magno hatete, Governu liu husi Ministeriu Saude (MS) perepara ona Postu Saude iha Suku 341 hodi fo atendimentu ba komunidade nia saude.
“Ita hatene katak iha TL nee Suku 400 resin iha ita nia rain, mais agora maioria husi Suku 341 nee ita iha Postu Saude neebe atu fo atendimentu ba ita nia komunidade sira,” hatete Vise Ministru ba Fortalesimentu Institusionál Saúde, José dos Reis Magno ba jornalista sira iha salaun CNE, Tersa (21/10/2025).
Nia dehan, husi Suku 341 iha ona Postu Saude sira, prezensa Postu Saude ninia funsionamentu nee atu fo atendimentu ba komunidade sira neebe presiza.
“Ita sei konstrui tan Postu Saude 100 resin iha Suku sira seluk, maibe iha suku 341 nee mos ita konta suku sira iha vila laran, tanba Sentru Saude mos besik hela iha suku sira nee, entaun hela oituan deit mak ita persiza haree,” nia esplika.
Nia tenik, Ministeriu Saude mos haree iha nivel aldeia sira, laos ba suku deit, tanba aldeia sira nee distansia dook, liu husi suku sira neebe Postu Saude iha.
“Ita haree distansia husi komunidade nia hela fatin mai iha Postu Saude nee dook, no aldeia mos mai iha postu saude sei dook, entaun ita tau hela pos tratamentu iha neeba, ho parteira ida, infermeiru ida ho saude publiku ida atu fo tratamentu ba ita nia komunidade neebe hela iha neeba,” nia deklara.
Governante nee informa, iha Oekusi populasaun barak mak hela dook husi Postu Saude, nunee Ministeriu Saude monta Pos Tratamentu maibe uza komunidade sira nian uma.
“Mezmu edifisiu laiha, maibe ita uza komunidade nia uma hodi tau Pos Tratamentu para bele fo atendimentu ba nesisidade komunidade nian wainhira presiza, maibe funsionamentu lao hela too agora,” katak nia.
Iha fatin katak, Komunidade Juliana Junior da Silva deklara, Postu Saude iha Aldeia Adavari, Suku Serelau, Postu Administrativu Lautem, Munisipíu Lautem, wainhira komunidade moras tenke halo tratamentu ba Sentru Saude iha Postu Administrativu Lautem nian.
“Ami iha Aldeia Adavari nee Postu Saude laiha, maibe iha Suku Serelau mak iha, maibe ami hela dook los nomos estrada aat, tanba nee ami labele ba halo tratamentu iha Suku Serelau no ami tenke lao dook husi aldeia nee ba Sentru Saude neebe iha Postu Administrativu Lautem nian,” nia afirma.
Jornalista: Jeniche da Costa
Editor: Domingas Gomes
