DILI, STLTIMORLESTE.com – Komando FALINTIL-Forsa Defeza Timor Leste (F-FDTL) fo parabens ba jogador militar feto no mane neebe sai manan nain ba 3° lugar ho skor 3-0.
Nia dehan, jogu amizade entre Forsa Defeza Australia ho FALINTIL-Forsa Defeza Timor Leste (F-FDTL) nee importante, iha jogu nee laos deit atu buka manan no buka lakon, maibe importante liu mak jogador militar sira transforma aan sai belun neebe diak no Forsa Armadas Australia ho F-FDTL nia amizade nee diak liu tan.
“Ba jogu futebol ida nee Komando FALINTIL-Forsa Defeza Timor Leste (F-FDTL) orgolhu, tanba ita boot sira jogu neebe diak hatudu ita boot sira nia talentu neebe diak, garante ita nia nasaun vizinhu Australia nian,” hatete Estadu Maior Jenerál FALINTIL-Forsa Defeza Timor Leste (F-FDTL), Tenente Jenerál Domingos Raul “Falur Rate Laek” neebe reprezentante husi Coronel Guido de Oliveira “Cuitado” ba jornalista sira wanhira ensera jogu amizade iha Edifisiu Komando F-FDTL Fatuhada, Dili, Tersa (21/10/2025).
Nia esplika, jogu ida nee Komando F-FDTL orgolhu tanba jogador militar husi feto no mane konsege konkista ba 3° Lugar.
“Durante imi jogu too iha Australia nee la fasil, ita hatene katak ita boot sira nia didikasaun, ita boot sira nia disiplina, ita boot sira nia komitmentu no ita boot sira nian treinu neebe makaas hodi konsista sai vensedor ba terseiru lugar, ida nee esforsu ida neebe ita boot sira halo, tanba ida nee Komando F-FDTL ohin hatoo parabens ba ita boot,” nia deklara.
Iha biban nee Estadu Maior Jenerál FALINTIL-Forsa Defeza Timor Leste (F-FDTL), Tenente Jenerál Domingos Raul “Falur Rate Laek” neebe reprezentante husi Coronel Guido de Oliveira “Cuitado” fo parabens ba ekipa husi FALINTIL-Forsa Defeza Timor Leste (F-FDTL) xefia husi Tenente Koronel Abel da Costa Xavier “NIKI” neebe lidera militar sira hodi ba joga futebol ida nee nomos ba treinador sira neebe esforsu fo treinu neebe diak hodi hetan rezultadu ida neebe diak.
“Espera iha futuru oin mai ita sei joga diak liu tan, tanba nee Komando F-FDTL sei fo apresiasaun makaas ba ita boot sira liu husi Komandante Komponente hotu-hotu neebe ita boot sira konsentra hamutuk iha nee, ami nia apresiasaun boot ba ita boot sira no husu ba ita boot sira mantein nafatin treinu neebe diak, atu melhora ita boot sira nia jogu iha futuru oin mai,” nia Informa.
Nia hatutan, tinan oin sei iha jogu, tanba nee husu ba militar sira treinu diak liu tan, nunee lori Instutisaun F-FDTL ba iha Mundu Internasional.
Jornalista: Jeniche da Costa
Editor: Xisto Mendonça
