DILI, STLTIMORLESTE.com – Ministeiu Edukasaun (ME) rekonhese eskola balun sei falta ijiene iha implementasaun programa merenda eskolar.
Xefe Departamentu Programa Merenda Eskolar iha ME, Belchior Maria Almeida Barros dehan, kuaze eskola hotu enfrenta buat ida nee, programa merenda eskolar nee obrigatoriu eskola hotu-hotu tenke implementa, tanba depois de implementa tinan 20 ona halao merenda eskolar, eskola barak nafatin hasoru problema iha infraestrutura, liu-liu ba iha bee no dapur, maibe nee kestaun boot ida. Tanba nee ME, Ministeriu Saude no Ministeriu Administrasaun Estatal nafatin tau atensaun, hodi asegura implementasaun merenda eskolar nee lao nafatin iha eskola sira.
“Buat ida higiene nee kompleksu, ita laos haree deit iha parte ida, maibe ita haree ba iha parte kompleksu. Se ita koalia konaba higiene ba preparasaun aihan, parte ida mak implementasaun merenda eskolar nee obrigatoriu. Nee katak, la haree ba kondisaun maibe ita haree ba eskola neebe diak no eskola neebe mak aat,ou eskola neebe iha fatin. Situasaun neebe mak agora dadaun eskola barak sira infrenta laiha bee. Koalia konaba higiene nee haree ba infraestrutura baze sira,” dehan Belchior ba STL, Kuarta (22/10/2025).
Nia dehan, koalia konaba dekretu lei nu setenta um nee garantia katak, labarik hotu,kada loron tenke hetan hahan neebe mak saudavel. Liafuan ida saudavel nee katak, hahan neebe mak diak, maibe iha eskola barak ninia kondisaun seidauk bele atu implementa.
“Formasaun ita fo nafatin atu oinsa mak kuzineira sira bele prepara hahan nee ho didiak. Sira tenke uza abental, nee hanesan parte ida husi higiene nee rasik, sira tenke hili modo neebe mak diak,” dehan nia.
Nia afrima, fase modo halo mos antes tein tenke fase liman. Nee kondisaun sira neebe mak fo ba sira iha formasaun.
Jornalista: Jacinta Sequeira
Editora: Domingas Gomes
