DILI, STLTIMORLESTE.com – Bolsa kandidatu profesores nain 2 husi eskola Munisípiu Ainaro husu muda fatin hanorin iha eskola, maibe parte husi Servisu Edukasaun Munisipiu (SEM) Ainaro sei halo konfirmasaun ho parte Ministeriu Edukasaun (ME) nasional.
Diretor Servisu Edukasaun Munisípiu Ainaro, Patricio da Costa Magno dehan, bolsa kandidatu balun iha Munisipiu nee telefoni mai SEM, sira husu atu muda fatin, maibe seidauk fo rezultadu.
“Ita nian bolsa kandidatu balun mak telefoni hau, liu-liu sira iha Munisipiu Ainaro. Ami iha nee postu hat, sira husi Postu Maubesi telefoni hau atu mai fali Ainaro, no husi Ainaro atu ba fali Maubesi, maibe hau seidauk fo rezultadu tanba sei okupadu ho ezame nasional. Hau sei konfirma ho parte ME nian liu husi rekursu umanu, sebele mak ita fo autorizasaun, se labele sira mantein hanorin iha eskola neebe koloka ona sira,” afirma Patricio ba STL liu husi telefone, Kuarta (22/10/2025).
Nia hatete, professores nain rua neebe husu muda fatin hanorin iha eskola nee, sira hanorin iha nibel ensinu baziku. Nain rua nee ida koloka mai iha tinan 2024, no ida seluk foin koloka mai iha loron 29 fulan Setembru tinan nee.
Iha fatin seluk Diretor Servisu Edukasaun Munisípiu Liquica, Julio da Silva hatete, bolsa kandidatu professores sira halao knar lao hanesan bai-bain, no sira mantein hanorin iha eskola neebe mak koloka tiha ona hodi bele hanorin estudantes sira.
Total bolsa kandidatu professores neebe koloka mai iha eskola sira Munisipiu Liquica hamutuk 127. Husi numeru ida nee mane 39 no feto 88, too ohin loron sira nafatin mantein fatin hanorin iha eskola neebe mak antes nee koloka ona sira.
Jornalista: Jacinta Sequeira
Editora: Domingas Gomes
