BAUKAU, STLTIMORLESTE.com – Ministeriu Agrikultura Pekuaria, Peskas no Floresta (MAPPF) seidauk halo verifikasaun ba proposta hamutuk 25 husi Munisipiu Baukau.
Xefe Departementu Peskas iha Diresaun Servisu Munisipal Agrikultura Baukau, Martino Ximenes informa, iha tinan 2025 nee Departementu Peskas Baukau simu proposta lubuk ida husi grupu peskador sira no proposta hotu parte Munisipal diriji ona ba Ministeriu Agrikultura Pekuaria Peskas no Floresta iha Nasional ho karta akompanha, tanba parte Nasional mak iha kompetensia foti desizaun ba proposta hotu, maibe too ohin loron ekipa Nasional husi Ministeriu refere seidauk halo verifikasaun ba proposta sira neebe diriji ona.
“Submete ona, tanba orsamentu hotu sentraliza iha Nasional, Proposta pur-volta 25 iha tinan ida nee mak submete ona ba Nasional,” dehan Martino ba jornalista sira, iha Vila Antiga, Baukau, Kuarta (22/10/2025).
Martinho dehan, husi proposta 25 nee dirize husi grupu peskador sira hamutuk 13 iha Munisipiu Baukau no husi proposta nee, husu atu Governu fo apoiu ekipamentu peskas nian ho kompletu neebe dirize ba Nasional besik tinan ida ona, maibe parte Nasional seidauk halo verifikasaun ba proposta refere.
Nia kompara, tinan 2025 ho tinan 2024 la hanesan, tanba iha tinan 2024 too fulan Outubru ekipa verifikador husi Nasional too ona nivel Munisipiu hodi halo verifikasaun ba grupu sira tuir proposta neebe diriji ona, maibe iha tinan 2025 too ona fulan Outubru, maibe verifikasaun seidauk akontese.
“Nee fo impaktu ba grupu sira, tanba ema nia proposta tama ona, ita nia komunidade mos hanoin proposta nee ba fulan ida rua mai ona, maibe prosesu nee mak naruk tebe-tebes dala ruma tau hamutuk husi Munisipiu hotu-hotu mak tuir mekanizmu halao tenderizasaun, maibe nee mekanizmu Nasional,” Martino katak.
Xefe Departementu nee argumentu, mezmu ekipa verifikador husi Nasional seidauk too iha nivel Munispiu hodi halo verifikasaun ba grupu peskadores sira neebe dirije proposta ba Ministeriu Agrikultura Pekuaria Peskas no Floresta, maibe iha ona informasaun Ministeriu prepara ona ro’o 10 kompletu ho ekipamentus atu apoiu ba grupu peskadores sira neebe tarjetu ona, maibe sei iha prosesu laran, tanba atu apoiu ro’o no ekipamentus ba grupu ida bazeia mos ba verifikasaun.
Jornalista: Tomas Reis
Editora: Carme Ximenes
