ERMERA, STLTIMORLESTE.com – Permatil konsege hamoris hikas bee matan tradisional hamutuk 700 liu iha territoriu Timor laran tomak.
Lia hirak nee hatoo husi Diretor Permatil Timor Leste, Ego Lemos ba jornalista sira iha Ermera, Kuarta (22/10/2025).
Nia hatete, daudaun nee Permatil hamoris hikas bee matan 700 liu iha teritoriu Timor laran tomak.
“Agora daudaun ita kobre aldeia rihun ida liu ona inklui Oekusi ho Atauro, durante nee ita konsege hamoris bee matan 700 liu, nee graça a Deus, bee matan sira uluk maran agora konsege rekopera fila fali,” informa Diretor Permatil Timor Leste, Ego Lemos.
Atu hatete deit katak, pratika diak nee ezemplu istoria susesu iha tiha ona, agora hein deit oinsa governu ho autoridade lokal sira ho sosiedade sivil hamutuk ho foinsae sira bele habelar liu tan programa nee iha territoriu tomak.
Nia reforsa, Permatil atu hamoris bee matan sira, nunee fornese bee ba komunidade, kontribui ba agrikultura, ba ambiente no mos moris loron-loron nian. Aleinde ida nee mos bele restaura fila fali ailaran sira, naturalmente bele dada fila fali animal fuik sira mai, halo Timor nee sai fali nasaun neebe matak no furak.
Nia hatutan tan katak, akompanamentu internasional primeiru neebe selebra iha Timor, ida nee depois organiza akampamentu rejional no nasional 14, liu-liu foka ba fo formasaun ba foinsae sira, nunee restaura bee matan sira.
Nia dehan, entaun tinan ida nee tema kuda bee hamoris komunidade, entaun partisipante agora daudaun iha akampamentu nee 800, sira mai husi munisípiu 14 iha territoriu tomak inklui 130 partisipante mai husi rai liur, husi nasaun 19 mak agora daudaun iha Timor,
espera katak depois akampamentu durante loron 5 too loron 25 iha workshop barak loro-loron, espera sai husi akampamentu nee joven sira bele fila ba restaura tan bee matan barak liu tan no mos partisipante internasional sira bele lori istoria furak husi Timor fahe ba sira nia maluk sira iha nasaun seluk.
Tanba hakarak muda narativu, iha liur ema sempre rona negativu, mais nufim agora partisipante internasional sira mai rasik iha nee hodi haree, pelumenus sira bele lori buat diak ruma husi Timor ba neeba konta katak, sira aprende buat ruma husi Timor.
iha fatin hanesan, Prezidente Republika, Jose Ramos Horta hatete, akampamentu nee laos primeira vez mak mai, pelumenus segundu vez ona, nunee fo parabens no agradesimentu boot ba Ego Lemos, neebe hatudu nia domin, nia matenek ba natureza, ba ailaran, bee matan sira nee, tanba problema bee iha Timor, iha NTT, iha mundu problema boot tebe-tebes.
Jornalista: Emerenciana Pinto
Editor: Xisto Mendonça
