DILI, STLTIMORLESTE.com – Ministeriu Edukasaun (ME) liu husi Servisu Edukasaun Munisípiu Dili, apoiu livru dos haat (4) ba Eskola Sekundariu Nobel da Paz.
Tuir Diretor Eskola Sekundariu Nobel da Paz, Jeremias P. de Jesus katak, Edukasaun Munisípiu nian apoiu ona livrus kaixa 4 mai ami estudantes nibel sekundariu sira.
“Ami prepara ona fatin ba biblioteka, tanba dadaun ami sei uza provizoriu edifisiu ensinu baziku ninia, maibe ho ami nian konstruksaun neebe lao dadaun nee fatin ba biblioteka iha fatin rua. Livru foin daudaun ba ensinu baziku no sekundariu nee foin daudaun fahe ona ba estudantes sira. Depois hau ba husu tan liu husi Edukasaun Munisípiu apoiu ona livrus dos 4 mai ami nian estudantes nibel sekundariu,” haktuir nia ba STL, Kinta (23/10/2025).
Jeremias dehan, eskola ida nee iha fulan kotuk simu ona livrus kaixa 4, neebe hetan apoiu husi ME liu husi Edukasaun Munisípiu Dili. Kaixa 4 nee livrus kompletu hotu, bainhira livrus menus mak sira sei halo fali pedidu ba ME liu husi Edukasaun Munisípiu Dili.
Iha fatin seluk, Direitor Nasional Ensinu Sekundariu iha ME, Benjamin Gomes da Cruz Fernandes hatete, husu ba eskola sira neebe sei menus livrus, tenke halo pedidu mai iha diresaun ensinu sekundariu, atu nunee hatoo ba iha diresaun kurrikulum ninia hodi bele fo apoiu livrus sira nee.
Jornalista: Jacinta Sequeira
Editora: Domingas Gomes
