DILI, STLTIMORLESTE.com – Timor Leste Coalition For Education (TLCE) husu atu hadia kualidade edukasaun, tanba TL sai ona membru Association of Southeast Asian Nations (ASEAN).
Liafuan nee haktuir husi Diretor Ezekutivu TLCE, Jose Monteiro ba jornalista STL, Segunda (27/10/2025).
Nia dehan, seidauk prepara buat ida no la presiza prepara aan, tan deit atu sai membru ba ASEAN.
“Buat nebee ita presiza halo iha area edukasaun ou area seluk mak konsentra ita nia vizaun estratejiku atu hasai ita nia povu husi kiak no mukit, liu husi fornese edukasaun ida neebe kualidade, hodi forma rekursu umanu kreativu, inovativu no kompetetivu,” nia dehan.
Nia hatete, labele konsidera tama ASEAN nee hanesan atu festa ida, neebe hatais roupa karun ba atividade kalan ida nian. Hafoin festa hahu susar atu han dala tolu loron ida, roupa lafase, ate bee atu haris mos laiha.
“Iha area edukasaun deit, ita la presiza hatudu buat ruma ba ASEAN. Ita konsentra deit atu halo esforsu oin oin hadia hasae kualidade edukasaun, presiza hadia infraestrutura eskola nian, nomos presiza edukador sira neebe kompetente. Ita presiza kurikulu ida nebee nakloke no bele ajusta ba mudansa oi oin inklui intelegensia artificial atu ita foinsae sira labele atraza nafatin,” nia afirma.
Nia hatutan, ho ida nee mak foin bele hatudu TL nia aan nudar estadu dignu iha estadu seluk membru ASEAN nia matan.
Nunee mos Reitor Dili Institute Of Technology (DIT), Salustiano dos Reis Piedade dehan, kuandu tama ona ba iha ASEAN nee, tenke prontu halo kompetisaun ho universidade iha rai liur. Sekuandu la halo kompetisaun, bele lakon merkadu, tanba nee ensinu superior sira tenke prontu kompete.
Jornalista: Jacinta Sequeira
Editora: Domingas Gomes
