BAUKAU, STLTIMORLESTE.com – Estrada diresaun husi area Samasau too Darsula iha Suku Maluru, Postu Administrativu Matebian, Munisipiu Baukau kondisaun aat.
Xefe Suku Maluru, Nuno Florindo informa, estrada diresaun husi area Samasau too area Darsula hamutuk kilometru 5, neebe tinan naruk ona difikulta komunidade sira nia movimentu, tanba kondisaun aat.
“Tempu udan nee difikulta duni, tanba ida nee ita nafatin husu ba Obras Publikas bele apoiu, tanba ita nia pedidu ba ona sira oinsa bele aprova responde ba dala nee,” Nuno Florindo hateten ba jornalista sira, iha Maluru, Segunda (27/10/2025).
Nia sublina, relasiona kondisaun estrada nee aat parte Suku relata ona pedidu ba Ministeriu Obras Publikas atu halo reabilitasaun, tanba iha tempu udan difikulta tebes komunidade sira neebe infrenta moras labele transporta ho karreta ambulansia ba Hospital, maibe hulan deit.
“Kuandu moras iha ona familia komunidade hotu hotu, ajuda ita hiit lori ba dalan mak karreta ambulansia mai tula,” Nuno relata.
Tanba nee husu Ministeriu Obras Publikas, atu responde pedidu neebe Suku relata ona hodi reabilita estrada nee, hodi fasilita komunidade sira nia movimentasaun ho transporte.
Mezmu nunee, maibe parte Suku mos planeia ona bainhira Ministeriu Obras Publikas la responde sedu, parte Suku sei utiliza Orsamentu husi Programa Nasional Dezenvolvimentu Suku halo reabilitasaun ba estrada nee.
“Ita iha ona planu orsamentu PNDS ba 2026, ita sei hadia hotu dalan neebe mak mai Suku Maluru hau nia planu sei cor hotu, dalan mai Suku Maluru tenke diak,” katak Nuno Florindo.
Jornalista: Tomas Reis
Editora: Carme Ximenes
