DILI, STLTIMORLESTE.com – Polisia Nasional Timor Leste (PNTL) liu husi Diresaun Tranzitu Seguransa Rodaviariu Nasional (DTSRN) sei la duni tuir transporte neebe viola sinais tranzitu, maibe kontrolu konjuntu husi sistema neebe estabelese.
Diretór DTSRN, Superintendente Xefe Polisia Antoninho Mauluta dehan, Diretora DNTT koalia direita ona ho nia, oinsa atu diskute hodi haree kona-ba zebra cross no sinais sira inklui kona-ba sistema foun neebe foin lansa nee.
“Diretora DNTT koalia ona direita ho hau, oinsa atu diskute haree kona-ba zebra cross no sinais sira inklui kona-ba sistem foun neebe ita foin lansa, oinsa ba kontrola ho efetivu,” hatete nia ba jornalista sira iha knaar fatin edifisiu Kuartel PNTL, Segunda (27/10/2025).
Nia dehan, Tranzitu ho DNTT sei diskute hamutuk oinsa hare konaba kontrola pasajeiru sira neebe hein mikrolete nomos atu tun iha dalan, nunee mikrolete sira labele hatun sala.
“Se ita nia mikrolete sira hatun sala fatin laos tuir fatin, sei kona-ba mos infrasaun. Ita-nia sistema lansa nee bainhira sira kontra, ita sei la duni tuir sira halai, maibe bainhira too nia tempu nia atu ba halo KIR iha DNTT, pur ezemplu nia para sala iha zebra cross leten iha neeba halo avizu, se nia la hakiduk, iha neeba nia komesa ona selu taxa”, nia esplika.
Nia tenik, transporte hanesan motor ka kareta privado ka publiku, tantu mikrolete no taxi bainhira viola sinais tranzitu nomos zebra cross sira, polisia tranzitu sei la duni tuir, maibe kontrolu konjuntu husi sistema neebe estabelese.
“Ita sei la duni tuir, maibe too tempu nia atu ba KIR mak nia foin kona iha DNTT iha neeba nia sei hasoru malu ho print out ida haruka nia ba selu iha banko, selu ida nia kontra para iha fatin zebra cross nee. Depois selu tiha mak mai nia foin ba tama iha KIR”, nia informa.
Ho sistema neebe lansa, nia reforsa, ba oin tranzito no DNTT sei kontrola konjunto liu husi sentral DNTT nian, maske tranzitu iha CCTV, maibe la hanesan ho DNTT nian.
“Ita nia dala ruma kontrola, maibe husi parte tranzitu sentral bolu ba postu tranzitu sira iha dalan, pur ezemplu nia kontra iha Bundaran Nicolau Lobato nia halai iha nee mai, ita monitorin husi sentral nee, ita bolu ba postu,” nia relata.
Nia dehan, ho sistema neebe foin lansa hahu nee sai servisu todan ba tranzitu no DNTT atu bele tun sosializa kona-ba sistema refere.
Diretór nee mos rekonese katak, sei iha difikulade boot ida mak ba transporte sira neebe seidauk iha xapa-matrikula bainhira viola sinais tranzitu nian neebe susar mos atu kontrola.
Iha fatin hanesan Motorista, Justino Oliveira dehan, motorista sira barak maka kontra sinais tranzitu, maibe polísia tranzito sira haree deit, tanba nee husu ba PNTL ho DNTT tenke implementa koima ba sidadaun neebe kontra regras tranzitu.
Jornalista: Jeniche da Costa
Editora: Domingas Gomes
