BAUKAU, STLTIMORLESTE.com – Autoridade Munisipiu Baukau koordena Lideransa Komunitaria sira, atu hametin nafatin pas no estabilidade iha tempu finadu.
Prezidente Autoridade Munisipiu Baukau, Veneranda Lemos informa, finadu loron importante ba komunidade hotu iha territoriu nasional sei halo movimentu husi Munisipiu ida ba Munisipiu seluk no husi Suku ida ba Suku seluk, tanba atu selebra loron matebian nian iha ida idak nia moris fatin neebe sei halo movimentu makaas iha loron refere, nunee Autoridade Munisipiu realiza enkontu ho lideres komunitaria sira atu organiza ambiete seguru iha ida idak nian Suku hodi la prejudika ba movimentasaun komunidade sira nian.
“Ita hatene finadu ema hotu sei ba mai, husi Munisipiu Suku sei lao ba malu oinsa mak kada Xefe Suku ho ninia estrutura iha Suku ho Administrador Postu sira, organiza sitausaun ambiete ho diak para familia sira mai husi fatin seluk lao ho avontade,” Veneranda hateten ba jornalista sira, bainhira remata enkontru ho Xefe Suku sira, iha salaun apuramentu Vila Nova, Baukau, Tersa (28/10/2025).
Nia kompara, finadu neebe sei selebra iha loron 02 Novembru 2025 nee tenke lao ho hakmatek, tanba esperensia finadu tinan 2024 nian hatudu ona iha Baukau lao hakmatek no kontroladu neebe fo kontente ba familia hotu lori aifuan ba rate.
Nunee finadu tinan nee Autoridade Munisipal nafatin fo hanoin ba lideres komunitaria sira, atu enkoraja jovem sira nafatin matein pas no estabilidade iha loron refere.
“Se iha karik problema individu labele lori grupu nia naran se problema entre individu ho individu buka atu rezolve, labele halo perturbasaun hodi la fo garantia pas no estabilidade ba ema seluk, tanba iha Baukau ema hotu iha direitu moris iha pas no estabilidade, se ema ida rua nia hahalok la fo garatia ba pas nee se mak atu garante,” Katak Veneranda.
Prezidente Autoridade Munisipiu Baukau nee akresenta, sidadaun hotu iha Munisipiu Baukau hakarak moris pas no hakmatek, tanba nee Autoridade Munisipal inisia enkontru refere atu observa ida idak nia Suku hodi garante pas no estabilidade, tanba pas no estabilidade sidadaun hotu livre halo movimentu iha kualker tempu, liu liu iha loron Santo Santa no Finadu tinan nee.
Xefe Suku Saelari Mateus Carlos informa, enkontru refere orienta lideres komunitaria sira, atu koopera ho parte seguransa Polisia Nasional Timor-Leste atu garantia seguransa iha nivel suku ba selebrasaun loron finadu, natal no tinan foun 2026.
“Ida nee mak importante ami enkontru ho Prezidente Autoridade nia rekomendasaun mak labele ami mesak deit, maibe ami mos fila enkontru ho ami nia Xefe Aldeia sira liu liu jovem no komunidade koordena no asegura ita nia eventu boot neebe atu mai,” Mateus katak.
Lideransa Komunitaria nee informa, enkontru refere parte Prezidente Autoridade Munisipiu Baukau mos orienta Xefe Suku sira atu kria enkontru ho Xefe Aldeia, Juventude no komunidade iha nivel Suku hodi garante pas no estabilidade iha selebrasaun loron finadu tinan nee, tanba selebrasaun finadu nuudar momentu importante neebe kada familia sei han hemu hamutuk ho matebian sira, maibe tenke ho disiplina respeita matebian sira tuir kultura Timor nian.
Entretantu enkontru nee realiza iha salaun apuramentu Vila Nova, Baukau hetan partisipasaun masimu husi Xefe Suku sira neebe akompanha husi Administrador Postu sira, iha Munisipiu Baukau.
Jornalista: Tomas Reis
Editora: Carme Ximenes
