DILI, STLTIMORLESTE.com – Timor Leste (TL) sai ona membru Association of Southeast Asian Nations (ASEAN) permanente, maibe sei hasoru defikuldade boot iha setor edukasaun.
Lia hirak nee hatoo husi Ministru Edukasaun (ME) Interinu, Domingos Lopes Lemos ba jornalista iha salaun Ian Martin Balide, Tersa (28/10/2025).
Nia dehan, nasaun TL tama ona iha membru permanente ba ASEAN nian, maibe sei hasoru defikuldade boot liu-liu iha parte edukasaun nian.
“Ita nia oan sira neebe ita eduka infrenta situasaun ida neebe difisil tebes, karik ita atu halo kompetisaun ho nasaun neebe sai ona ba membru ASEAN ninia, sai problema boot ba ita. Agora saida mak ita atu halo ho oportunidade neebe kapas tebes mai Ita,” nia haktuir.
Governante nee dehan, maske TL foun no foin tama ba membru ASEAN, maibe iha era ida neebe maka avansadu la signifika TL foin tama ba ASEAN no atu halai ba kotuk, maibe TL tenke lao ba oin.
Nunee mos Diretor Ezekutivu TLCE, Jose Monteiro haktuir, labele konsidera tama ASEAN nee hanesan atu festa ida, neebe hatais roupa karun ba atividade kalan ida nian, hafoin festa nee hotu, hahu susar atu han dala tolu loron ida, roupa lafase, ate bee atu haris mos laiha. Tanba TL lakohi atu sai nia aan rasik. Tanba ASEAN nee oportunidade atu fo no foti.
Jornalista: Jacinta Sequeira
Editora: Domingas Gomes
