BAUKAU, STLTIMORLESTE.com – Iha fulan Novembru tinan nee Governu sei lansa fatuk dahuluk ba projetu reabilita estrada urbana Baukau Vila.
Prezidente Autoridade Munisipiu Baukau, Veneranda Lemos informa, hafoin remata komunikasoens entre Autoridade Munisipal Baukau ho Governu Sentral kona-ba preparasaun dokumentus reabilita estrada urbana Baukau Vila, parte Autoridade Munisipiu Baukau simu ona informsaun husi Governu Sentral, projetu reabilita estrada urbana Baukau Vila sei lansa fatuk dahuluk iha fulan Novembru tinan nee.
“Ami simu ona informasaun, iha fulan Novembru nia laran hau ladun hatene, parese meiadu Novembru nee ita sei halo lansamentu ba reabilitasaun estrada urbana,” Veneranda hateten ba jornalista sira, bainhira remata enkontru ho Xefe Suku sira iha salaun apuramentu, Vila Nov,a Baukau, Tersa (28/10/2025).
Nia sublina, estrada urbana Baukau Vila neebe sei hetan reabilitasaun iha fulan Novembru tinan nee hamutuk kilometru 23 neebe sei kobre diresaun husi Vila Antiga too Vila Nova no Vila Nova kontinua too iha area Nagardjo no husi Vila Antiga too area Nagardjo inklui estrada diresaun husi Tirilolo ba Kaibada Makasae, Vila Antiga ba Kaibada Uaimua nomos estrada bairu balu iha Vila laran neebe naran tama ona iha lista projetu refere.
Maibe projetu nee iha dezenhu hetan mudansa, tanba nee estrada diresaun husi Vila Antiga too area Nagardjo parte Uainiki nafatin sei loke luan, enkuantu husi area Nagardjo too Suku Tirilolo area loja konstrusaun simples nian posibilidade sei loke luan, tanba halo estrada diresaun rua (Two Weis). Hanesan diresaun husi Nagardjo too rotunda Vila Nova sei estabelese kaixa kontrolu bee iha area postu abastesimentu realistic fuel nian foin kanaliza sai, tanba iha area refere tempu udan laiha bee dalan atu suli tuir.
“Estrada ida husi B.O.P nian tun mai iha kraik nee mak sei iha kestaun ida ke prezisa tekniku sira haree tanba laiha, dala ruma atu fo sai bee liu liu iha realistic nia oin nee mak klean oituan, moru realistic nian sira riska ona tenke sai hotu, tanba presiza halo kaixa kontrolu bee ninian,” Veneranda katak.
Nia akresenta, projetu refere liu liu diresaun husi area Nagardjo too Suku Tirilolo area loja konstrusaun simples nian posibilidade sei loke luan metru 22, nunee parede postu abastesimentu realistic fuel nian neebe ekipa konjunta husi Autoridade Munisipiu Baukau fo ona riska mean sei sobu sai no uma komunidade balu posibilidade sei afeta ba projetu refere.
Enkuantu kona-ba indemnizasaun parte Munisipiu laiha kompetensia, maibe bainhira projetu refere implementa iha afetadu ruma sei relata ba Nasional hodi fo resposta.
“Prontu, ida nee asuntu Nasional nian ami presiza informa karik se iha komunidade ruma mak afeta, maibe durante ami hamoos iha sidade laran hau seidauk nota,” Veneranda argumenta.
Nunee mos Xefe Suku Kaibada, Cosme da Costa Lopes hateten, relasiona projetu reabilitasaun estrada urbana Baukau Vila kilometru 23 neebe sei lansa fatuk dahuluk iha fulan Novembru tinan nee apresia ba esforsu Prezidente Autoridade Munisipiu Baukau, tanba projetu refere laos mosu hanesan milagre, maibe liu husi esforsu, tanba nee husu Governu molok implementa projetu refere halo aprosimasaun ho komunidade sira bainhira iha afetadu ba projetu refere.
“Hau hanoin Governu iha tiha ona planu ona karik mai halo reabilitasaun primeiru tenke halo aprosimasaun ho komunidade sira, no komunidade sira tenke orgulhu no agradese tenke koopera ho Governu, tanba estrada mai iha ita nia Munisipiu diak tebes tebes,” Comes katak.
Tuir Lideransa Komunitaria nee katak, komunidade sira tenke koopera ho projetu refere bainhira implementa ona, tanba estrada mak solusaun ba dezenvolvimentu.
Nia informa, estrada diresaun husi Vila Antiga ba Suku Kaibada daudaun nee kondisaun aat no grave neebe difikulta komunidade sira nia movimentu ho transporte publiku no privadu, maibe bainhira projetu refere implementa sei ajuda mos komunidade Kaibada, tanba projetu refere kobre mos too iha Kaibada.
Entretantu projetu nee sei finansia, husi Ministeriu Obras Publikas no Ministeriu Planeiamentu Investimentu no Estratejiku no kompanhia implementador JOVA.
Jornalista: Tomas Reis
Editora: Carme Ximenes
