DILI, STLTIMORLESTE.com – Visi Primeiru Ministru, Mariano Assanami Sabino fo orgulhu ba parte hotu-hotu nia kontribuisaun, liu-liu aman luta nain sira ho sira nia sakrifisiu no ema hotu nia kontribuisaun lori TL tama ASEAN no ohin festa popular, laos festa Governu ida nee nia deit maibe ema hotu nia.
Visi Primeiru Ministru Mariano Asanami Sabino hatoo kestaun nee ba jornalista iha Palasiu Prezidensial Nicolau Lobato Bairru Pite, Kuarta (29/10/2025).
Nia hatete, TL sai membru ASEAN nee luta husi aman luta nain sira, tanba nee orgullu ba Primeiru Ministru Xanana Gusmao, Prezidente Republika Jose Ramos Horta, orgullu ba Eis Primeiru Ministru Mari Alkatiri, no orgullu ba Eis Prezidente Republika, Francisco Guterres Lu Olo, Taur Matan Ruak, Lere Anan Timur hamutuk ho veteranus no parte hotu hotu nia kontribuisaun.
Visi Primeiru Ministru Mariano Asanami Sabino hatete, ohin governu lahalo mobilizasaun maibe joven no estudante sira voluntariu mai, entau agora organiza didiak nunee lokraik (Red- Kuarta) bele simu Primeiru Ministru Kay Rala Xanana Gusmao.
Nee hatudu antusismo joven sira nia, labarik sira nia tanba hatene katak determinasaun neebe mak lider sira halo nee jerasaun foun ba joven sira nia futuru i nee atu dehan, nee festa popular feto lideransa hotu hotu nia festa partidu politiko hotu hotu nia tanba nee desde 1974 kedas mai too ohin loron.
“Nee hotu hotu sente katak laos Governu ida nee nia deit laos partidu ida rua nia, maibe nee festa povu tomak nia festa popular ema hotu orgullu kontente tanba ita bele tama asean nee importante, labele haluha katak durante 24 anos ita nia luta laiha iha asean fo apoiu ita mais ohin asean hotu hotu rekoinese ita nuudar membru ida nee mak save nemak importante restu ita sei esforsu para ita mos igual hanesan ho mos nasaun asean, ita laba ho liman mamuk ita garante ita nia Liberdade neebe iha liberdade ba media neebe ke ita iha ona demokrasia neebe ita iha ona direitus humanus dignidade umana, freternidade umana neebe ita luta kontinua nafatin ida nee liu liu modelu demokrasia partipasaun neebe iha,” dehan Visi PM.
Sabino hatete, Timor Leste sai membru ASEAN ho valor rasik. Timor Leste konsege rejolve problema depois tinan 24 luta maibe konsege rejolve problema ho Indonezia, no Timor Leste iha fronteira ida neebe kria ho dame no pas ida nee lisaun neebe TL fo.
Jornalista: Emerenciana Pinto
Editora: Domingas Gomes
