DILI, STLTIMORLESTE.com – Visi Primeiru Ministru, Mariano Asanami Sabino hatete, Kurrikulu Timor Leste tenke estandar ASEAN no Internasional.
Visi Primeiru Ministru Mariano Assanami Sabino hatoo kestaun nee ba jornalista iha Palasiu Prezidensial Nicolau Lobato, Bairru Pite, Kuarta (29/10/2025).
Nia hatete, oras nee TL sai ona membru ASEAN tenke estandarniza kurikulum estandar ASEAN no internasional.
“Ita laos hakarak deit harmoniza lae, ita tenke estandarniza ita nia kurikulum estandar ASEAN no internasional inklui ensinu superior. Ensinu superior sira labele Timor oan sira mak eskola iha nee deit, maibe loke dalan ba ema seluk eskola. Ema seluk mak eskola iha nee ita presiza iha kualidade neebe diak,” dehan Visi PM nee.
Iha biban nee Visi Primeiru Ministru hatete, Timor Leste sai membru ASEAN ona, no lingua mos lasai bareira ba Timor Leste.
“Ita tenke orgulhu ho ita nia tetun, ingles presiza tau tradutor ida iha neeba hodi koalia tetun no portugues, tanba ita agora barak mak koalia ingles no portugues no koalia tetun. Lingua laiha bareira joven sira tenke aprende estuda, ita nee rejistir para venser estuda aprende para manan, neebe laiha dalan ita lahatene ingles ka ou ita lahatene portugues ita iha dalan tenke aprende no tenke estuda. ASEAN mos ita nia identidade, neebe bele mos koalia tetun nusa mak labele tradutor iha neeba. Ema Vietname koalia nia lian, tanba saida ita labele. Neebe lingua laos kestaun ida,” dehan Assanami.
Visi Primeiru Ministru argumenta, lingua laos sai kestaun maibe ema bele aprende iha lian ingles, tanba iha diskusaun ruma ho ingles maibe dala ruma halo diskursu ruma orgulhu ho lian rasik nemak identidade neebe laiha problema.
Jornalista: Emerenciana Pinto
Editora: Domingas Gomes
