DILI, STLTIMORLESTE.com – Sekretariu Komisaun Rekrutamentu Ajente Polisia Nasional Timor Leste (PNTL) foun tinan 2025 fo sai katak, kandidatu nain 340 la partispa iha teste prova kultural neebe realiza iha 12 Outubru foin lalais nee.
Tanba nee komisaun mos anunsia sai ba publiku orariu faze teste tuir mai ba prova aptidaun fiziku, intervista profisional no prova psikolojia sei hahu iha loron 06 Novembru 2025.
Nia dehan, bazeia alterasaun dahuluk diploma ministerial nu. 17/2025 25 Julhu ba diploma ministerial nu. 37/2025 10 Outubru neebe halo alterasaun kona-ba rezultadu teste husi eliminatoriu ba fali akumulativu, exeptu prova mediku sei aplika aptu la aptu.
“Tanba nee husu kandidatu neebe partisipa ona teste prova kultural iha fulan Outubru foin lalais atu kontinua partisipa iha teste prova aptidaun fiziku, entrevista profisional no prova psikolojia,” hatete Portavos Komisaun Rekrutamentu Superintendente Polisia, Antonio da Luz ba jornalista sira liu husi konferensia imprensa iha CFP, Komoro, kuarta (29/10/2025)
Nia esplika, tuir orariu teste hahu 06 too 08 Novembru, husi Munisipiu Aileu mak sei mai partisipa teste no iha dia 10 too 11 Novembru husi Ainaro, dia 13 too 15 Novembru kontinua Ainaro ho Baukau too 17 Novembru.
Nia informa, iha dia 18 too 20 Novembru kontinua ho Munisipiu Bobonaro no dia 21 too 22 Novembru kontinua Kovalima. Enkuantu iha dia 24 too 27 Novembru Dili Centru Formasaun Polísia no kontinua Dili iha dia 29 Novembru too iha 01 Dezembru. No dia 02 too 09 Dezembru kontinua kandidatu sira neebe iha Munisipiu Dili nian.
Mezmu nunee, iha dia 10 too 12 Dezembru Munisipiu Ermera, Lautem iha dia 13 too 15 Dezembru no Likisa hahu dia 16 too 18 Dezembru no Manatutu hahu 19 too 20 Dezembru. Munisipiu Manufahi hahu 22 too 23 Dezembru, Oekusi 26 too 27 Dezembru no Vikeke 29 too 30 Dezembru 2025.
“Ida nee orariu neebe kandidatu sira sei mai tuir teste. Kandidatu sira neebe mai tuir teste kada loron ida nain 300, iha dader 150 husi tuku 7 too 12 no loraik 150 hahu husi tuku 1:30 too 5:30”, nia relata.
Tanba nee Komisaun Rekrutamentu husu ba kandidatu sira atu lori dokumentus hanesan kartaun eleitoral orijinal, BI no resibu prova kultural nian no kandidatu sira sei lori hahan no bee rasik durante teste.
Nia husu ba kandidatu sira lori ho sapatu kets no kalsa desportu badak no kamizola kaus. No ba entrevista profisional kandidatu sira uza sapatu, kalsa naruk no faru liman badak ou naruk no kaber.
Aleinde nee Komisaun mos bandu kandidatu sira hasai foto durante entrevista profisional no prova psikolojia. Nomos sei la autoriza inan-aman no familia atu akompanha kandidatu sira tama iha fatin teste prova nian.
Nia mos relata katak, orariu ba teste prova nian bele iha mudansa kada tempu. Tanba nee husu ba kandidatu sira atu nafatin komunika ho Sekretariu Komisaun Rekrutamentu hodi bele hetan konfirmasaun.
“Ba kandidatu sira bele haree orariu teste prova nian ne’ebe mak taka iha munisipiu idak-idak kada komando PNTL”, nia deklara.
Enkuantu, rezultadu valor ba kandidatu sira neebe tuir teste, Komisaun Rekrutamentu sei fo sai, bainhira kandidatu sira konklui ona teste prova haat (4) mak prova kultural, fiziku, Psikolojia no Entrevista Profisional. Kandidatu nain 340 la tuir teste prova kultural.
“Tanba ida nee, sistema akumulativu ne’ebe valor so teste prova haat nee hotu foin fo sai dala ida. Iha teste prova kultural liu ona nee, iha ema nain 340 mak la partisipa, neebe antes nee kandidatu 13.106, maibe 340 mak la partisipa iha ezame”, nia koalia.
Nia hatutan, kandidatu ne’ebe mak atu tuir teste prova tuir mai mak 12.996, nee husi Munisipiu sira hotu.
“Nunee rezultadu valor sira nee, sira teste parte haat nee hotu mak fo sai no se mak hetan valor boot husi 1 too 400 mak pasa ba iha teste mediku”, nia afirma.
Nia apela ba kandidatu sira atu halo preparasaun ho diak. Tanba teste tuir mai, teste neebe rigorozu hanesan fiziku, psikolojia no entrevista profisional no ikus liu ba teste mediku ba sira neebe mak aptu ona.
Jornalista: Jeniche da Costa
Editor: Xisto Mendonça
