BAUKAU, STLTIMORLESTE.com – Ministeriu Obras Publikas (MOP) sei halo reabilitasaun estrada ba Suku Maluru, Postu Administrativu Matebian, Munisipiu Baukau, iha tinan 2026.
Koordenador Tekniku Obras Publikas Destakadu Munisipiu Baukau, Diego Cipriano Caleza informa, liu husi ekipa tekniku halo ona levantamentu dadus ba kondisaun estrada, iha Suku Maluru no relara ona ba Nasional neebe hetan ona verifikasaun husi Ajensia Dezenvolvimentu Nasional (ADN).
“Estrada nee hetan tiha ona husi ADN foin lalais semana rua ba kotuk ADN verifika tiha ona, bainhira ADN verifika rezultadu konklui sei fila fali mai Obras Publikas para loke prosesu tenderizasaun,” Caleza informa ba STL iha knaar fatin, Uatulete, Baukau, Kuarta (29/10/2025).
Nia sublina, projetu nee sei enkaixa iha lista projetu tinan 2026, tanba nee MOP sei hein rezultadu verifikasaun husi ADN, bainhira ADN konklui ona verifikasaun no relara hikas rezultadu ba MOP hodi loke tenderizasaun ba projetu refere.
Maibe dadus ba estrada refere neebe ADN halo verifikasaun hamutuk kilometru 2.65, neebe sei hahu reabilita husi area merkadu nian too Sede Suku Maluru nian sorin ho tipu reabilita cor sementi.
“Estrada Suku Maluru ba 2026 ami tau 2.65 kilometru, reabilitasaun ho tipu plan concrit papimentu,” Caleza akresenta.
Koordendor nee dekalara, mezmu tuir Xefe Suku Maluru nia dekarasaun katak relata ona proposta ba Ministeriu Obras Publikas, atu reabilita estrada refere hamutuk kilometru 5 diresaun husi area Samasau ba Darsula, maibe responde deit kilometru 2.65, tanba ekipa rasik halo levantamentu ba estrada refere.
“Proposta nee mai Obras Publikas karik hau ladun hatene, tanba la tau iha hau nia meza hau labele fo komentariu,” Caleza katak.
Entretantu projetu reabilitasaun estrada rural iha Munisipiu Baukau ba tinan 2026 nian, hamutuk pakote 12 mak hetan ona verifikasaun husi ADN.
Jornalista: Tomas Reis
Editora: Carme Ximenes
