DILI, STLTIMORLESTE.com – Primeiru Ministru (PM), Kay Rala Xanana Gusmão hatete, oras nee Timor Leste sai ona membru ASEAN, hahu mos ho Responsabilidade foun.
Xefe Governu dehan, Prezidente Republika, Jose Ramos Horta ba Kuala Lumpur diak tebes hatudu katak, povu tomak instituisaun estadu nia apresia tebes vontade husi rai sira neebe konstitui iha asean atu simu Timor nuudar membru foun ida.
“Sira hotu kontente tebes hanesan hodikalan derepente deit hau hanoin ba nee festa deit atu tiktok mais bolu fali hau ba koalia, neebe hahu responsablidade foun ida, oportunidade iha, tanba nee hodikalan hau dehan tiha ona katak sei fo hatene sosiedade tomak sa aproveita mak ita hetan husi asean saida mak ita bele kontribui ba asean,” dehan PM, Xanana ba jornalista sira, iha Palasiu Prezidensial, Nicolau Lobato, Bairo Pite, Dili.
Primeiru Ministru hatete, bazeia ba politikamente Timor Leste ezemplu pas no esforsu makaas atu dezenvolve rai, mais ekonomikamente Timor buka aprende ho rai sira iha asean lao kapaas.
“Ita aprende laos atu kopia maibe aprende hodi dehan bele aplika iha ita nia rai kalae? I buat barak iha mundu, diskusaun iha samit laran, laos deit ho membru asean nia maibe mos ho prosesu sira, ho parseru sira husi Amerika, uniaun Europeia, ONU, Nova zelandia, japaun, Australia, Xina, Korea, no iha preokupasaun boot konaba mundu agora nee neebe ita dehan katak inserteza makaas tebes koalia konaba diak liu ita defende kooperasaun duke kompetisaun,” dehan PM, Xanana.
Xanana dehan, kompetisaun nee entre rai ida ho rai seluk, maibe koperasaun nee oinsa kopera malu, oinsa bele hasae kualidade joven sira husi Timor nia laos deit atu hasai graduasaun maibe atu ba aprende hodi prepara aan kaer Timor Leste.
Koalia kona-ba novu jerasaun, balu dehan tanba sa oras nee Horta katuas ona, Xanana katuas ona tanba sa kaer nafatin ukun no tanba sa joven sira la troka.
“Haree ba jerasaun agora nee matenek barak tebes hau nee SMA, no SMA nee atu kompara ho sira be graduadu nee Universidade doutoradu buat sira nee hotu ladun labele kompara maibe problema ida nee hanoin mak ida nee lahanoin luan, haree agrikultura haree los agrikultura deit, hau haree turismo haree los turizmu deit laloke luan ita nia hanoin ida nee mak presiza duni loke luan matenek sira nova jerasaun nia hanoin tanba selae ita labook aan susar oituan,” dehan PM, Xanana.
Xefe Governu afirma, tama asean nee oportunidade maibe responsablidade boot, no responsablidade nee iha preparasaun atu partisipa, no iha preparasaun atu aproveita oportunidade sira nee liu liu iha mudansa mentalidade babain ema bolu maincet no karakter nova jerasaun nia.
Jerasaun tuan idade avansadu ona maibe jerasaun foun mak presiza prepara aan hodi aproveita oportunidade atu hasae mentalidade.
Uluk nuudar observador ba rona deit la fo komentariu ruma no foin mak TL tama neebe ladun iha oportunidade koalia barak neebe aproveita agora sai ona membru ba fali samit seluk tenke koalia barak oinsa iha duvida ho rai seluk iha area hotu hotu iha ekonomia no seluk tan.
Jornalista: Emerenciana Pinto
Editora: Carme Ximenes
