BAUKAU, STLTIMORLESTE.com – Sidadaun mane ida taa kotu feto ida nia liman iha Aldeia Iramer, Suku Luka, Postu Administrativu Vikeke Vila, Munisipiu Vikeke.
Xefe Suku Luka, Manuel Gomes haktuir, kazu nee akontese iha loron 02 Novembru 2025 tuku 16:00 loraik, bainhira feto vitima inisial T fila husi area Klalalerek too iha uma iha diskusaun balu ho sidadaun inisial L too rezulta T nia liman karuk kotu, tanba taa husi L.
“Sira iha uma iha diskusaun depois lori katana taa deit vitima nia liman karuk mak kotu,” Manuel informa ba STL, lii husi telefone, Segunda (03/11/2025).
Nia sublina, hafoin kazu nee akontese mediku sira too kedas fatin hodi evakua vitima T ba Ospital Munisipiu Vikeke, hodi halo tratamentu, enkuantu parte Polisia Munisipiu Vikeke foti L hodi halao identifikasaun.
Komandante Komando Polisia Munisipiu Vikeke, Superintendente Polisia António do Rego fundamenta, kazu taa kotu liman iha Suku Luka daudaun parte Polisia halo ona atendimentu, suspeitu detein ona no vitima halo ona tratamentu iha Hospital Munisipiu Vikeke.
“Envolvimentu nee pesoal ho pesoal problema uma laran, nia taa kotu kedas nia feton nia liman karuk, katana rua kedas ita prende hotu ona,” Komadante nee konta.
Superintendente Polisia António do Rego konsidera agresaun fiziku agravadu, maibe suspeitu dadaun detein ona iha sela Komando Polisia Munisipiu Vikeke neebe sei aprezenta ba Ministeriu Publiku iha tempu badak, tanba asaun ba kazu refere fragante delito.
Jornalista: Tomas Reis
Editora: Carme Ximenes
