DILI, STLTIMORLESTE.com – Feto laos deit iha abilidade atu halao servisu barak, maibe tenke iha mos korajen defende ninia direitu, tanba feto barak matenek muda sosiedade.
Kestaun nee hatoo husi Xefe Departamentu Tesureira no Kontablidade Prezidensia Republika, Casimira Lopes da Costa liu husi nia mensajen neebe STL asesu iha Tersa (04/11/2025).
Nia hatete, feto laos deit halo serbisu barak, maibe bele defende ninia direitu tanba feto barak matenek.
“Signifikadu kmanek feto nia laos deit iha abilidade atu halao serbisu barak, maibe iha korajen atu defende ninia direitu, feto laos fraku maibe feto forte, matenek no iha kbiit atu bele muda mundu no sosiedade ho vontade fee no esperansa,” dehan Casimira.
Alende nee iha selebrasaun loron Nasional Feto Timor-Leste ba dala 49 ho tema Feto Timor-Leste Selebra o Nia Direitu, Igualdade no Opportunidade, Prezidensia Republika selebra no fo konese figura feto inspiradora sira iha Prezidensia Republika.
Casimira Lopes da Costa, Xefe Departamentu Tesuaria no Kontabilidade iha Diresaun Finansas no Planeamentu, nuudar funsionaria dedikada neebe servisu iha Prezidensia Republika dezde 2007.
Durante tinan 18, Casimira kontribui signifikativamente ba instituisaun. Xefe Casimira halao papel importante rua, iha família nuudar inan no kaben neebe fo domin no karinu ba ninia família no iha servisu fatin, nuudar xefe neebe responsavel ba pagamentu no ezekusaun tesuaria nian, inklui mos relatoriu sira.
Maske hasoru dezafiu ho tempu neebe limitadu hodi fahe ba familia no servisu, nia konsege organiza no aproveita tempu ho diak, fo prioridade ba servisu importante no urgente sira.
Estratejia simples maibe efetivu ida nee halo nia bele sai pilar ba ninia família enkuantu kontinua halao ninia knaar estadu nian ho profesionalizmu.
Xefe Casimira hanesan exemplu diretu kona-ba kbiit feto nian. Nia kareira sai testemunha ba dedikasaun no kompetensia neebe feto Timor-Leste iha. Maibe nia susesu la mai deit husi nia abilidade profesional, maibe husi nia kbiit atu balansu papel kompletu sira iha vida nian.
Jornalista: Emerenciana Pinto
Editora: Domingas Gomes
