BAUKAU, STLTIMORLESTE.com – Komando Polisia Munisipiu Baukau relata, durante selebrasaun loron finadu iha Munisipiu Baukau situasaun lao hakmatek.
Komadante Komando Polisia Munisipiu Baukau, Superintendente João Sancho Pires hateten, preparasaun seguransa ba selebrasaun loron finadu iha Munisipiu Baukau implementa operasaun konjunta husi Polisia Nasional Timor Leste (PNTL), Batalhão Ordem Publiku (B.O.P) no FALINTIL-Forsa Defeza Timor-Leste (F-FDTL) neebe durante nee halao patrolhamentu, iha area juridiku Baukau hodi fo seguransa ba selebrasaun loron finadu.
Tanba nee agradese no apresia ba komunidade Baukau tomak hahu husi Jovem feto, mane, inan aman no Autoridade Suku, Postu, Veteranu sira nia kontribuisaun, tanba hatudu duni maturidade nuudar Baukau oan hodi kontribui pas no estabilidade iha loron refere.
“Situasaun finadu hahu husi dia 01 dia 02 entermus iha Baukau laran situasaun iha semiteriu hotu hotu iha Postu Administrativu 8 nee laiha problema ida, lao diak. Tanba nee lori Komando apresia no louva komunidade Baukau tomak neebe kontribui makaas ba eventu dia 01 no dia 02,” João Sancho Pires informa ba jornalista sira, iha nia knaar fatin Vila Nova, Baukau, Tersa (04/11/2025).
Mezmu nunee, maibe iha loron 02 Novembru 2025 parte kalan mosu insidente balu, tanba iha Suku Kaibada, Postu Administrativu Baukau Vila, Munisipiu Baukau mosu tuda malu entre jovem sira, maibe la afeta ba selebrasaun loron finadu iha Munisipiu Baukau.
“Kazu nee iha tiha kalan ema hotu hotu kari aifunan hotu mak mosu akontese iha Kaibada jovem sira balu duni malu nee mak hamosu konfrotasaun oituan, maibe ita atende kedas ho ita nia forsa PNTL, B.O.P hamutuk ho Defeza ita atua kedas kazu sira nee agora daudaun prosesu hela, nee la prejudika ba finadu nian, finadu situasaun hotu lao diak hela,” João Sancho Pires komenta.
Nia deklara, kona-ba kazu tuda malu iha Suku Kaibada, parte Komando Polisia Baukau asegura kedas jovem sira neebe involve no daudaun rejistu ona iha Ministeriu Publiku hodi kontinua prosesu ba oin.
Komadante nee kompara, situasaun iha ambitu loron finadu tinan nee iha Munisipiu Baukau lao hakmatek tebes la hanesan tinan hirak ba kotuk neebe sempre tuda malu entre jovem sira iha semiteriu laran.
“Semiteriu hotu hotu iha Baukau nein mosu problema ida tuda malu hanesan uluk liu ba laiha, tanba ema hotu hotu nia kontribusaun,” katak João Sancho Pires
Aleinde mos nia relata iha loron 02 Novembru 2025, Komando Polisia Munisipiu Baukau liu husi Seksaun Tranzitu rejistu asidente iha area Postu Administrativu Matebian, rezulta ema ida hetan tohar iha parte ain no daudaun halao tratamentu iha Hospital Rejional Eduardo Ximenes (HoREX) Baukau no loron 03 Novembru 2025 motor ida diresaun husi Munisipiu Lautem ba Dili too iha area Suku Buruma, Postu Baukau Vila soke bibi rezulta motorista hetan kanek no daudaun halao tratamentu iha HoREX Baukau
Entretantu durante selebrasaun loron finadu Komando Polisia Munisipiu Baukau, la rejistu kazu mate husi asidente no seluk tan.
Jornalista: Tomas Reis
Editora: Carme Ximenes
