BAUKAU, STLTIMORLESTE.com – Mosu dezentendimentu entre oknum membru FALINTIL-Forsa Defeza Timor Leste (F-FDTL) ida ho membru Polisia Nasional Timor Leste (PNTL) nain ida iha area Postu Administrativu Matebian, no iha sorin seluk oknum F-FDTL ida mos baku rahun uma komunidade ida nian iha Suku Lakuliu, Postu Administrativu Kelikai, Munisipiu Baukau.
Komadante Komando Polisia Munisipiu Baukau, Superintendente João Sancho Pires informa, kazu nee akontese iha loron 01 Novembru 2025 parte kalan bainhira membru F-FDTL insial O.G.D.C halimar hela biliar ho kondisaun lanu neebe halimar biliar barolliu liu iha oras deskansa kalan nian, tanba nee membru Polisia sira ba hakalma, maibe membru F-FDTL refere halo agresaun fiziku simples hasoru membru Polisia insial C.
“Inisia neebe mosu kolega nee halimar hela biliar liu tiha 12:00 ba leten ona barolliu nee mak ita nia membru sira ba para koalia ho nia bele para, maibe alin nee tanba lanu todan liu too ikus agresaun simples ho ita nia membru,” João Sancho Pires informa ba jornalista sira iha knaar fatin Vila Nova Baukau, Tersa (04/0/11/2025).
Hafoin akontese, parte Polisia halo kontaktu direita liu husi via telefone ho parte Polisia Militar (PM) too kedas fatin hodi evakua membru F-FDTL refere entrega ba Komando F-FDTL hodi prosesu tuir dalan militar no Komando Polisia Munisipiu Baukau mos rejistu ona iha Ministeriu Publiku hodi prosesu tuir dalan justisa.
Aliende mos Komadante Komando Polisia Munisipiu Baukau nee relata iha loron hanesan, oknum membru F-FDTL ida inisial C.F hamutuk ho familia baku rahun uma komunidade ida iha area Suku Lakuliu, Postu Administrativu Kelikai Munisipiu Baukau, tanba kazu rai.
“Oknum rua nee entrega hotu ona ba Forsa Polisia Militar para prosesu hela ita nia kazu mos lao nafatin rejistu iha Ministeriu Publiku kontinua prosesu lao hela,” João Sancho Pires hakotu.
Jornalista: Tomas Reis
Editora: Carme Ximenes
