DILI, STLTIMORLESTE.com – Polisia Nasional Timor Leste (PNTL) durante selebrasaun loron matebian hahu husi loron 1 too 2 Novembru 2025 rejista kazu krimi 8.
Komandante Polisia Nasional Timor Leste (PNTL) Munisípiu Dili Superintendente Xefe Polísia Orlando Gomes hatete, husi kazu krime 8 nee, ida akontese iha área Kristu Rei iha kazu ofensa integridade fízika simples ho forma ida violénsia doméstika, akontese iha Dom Aleixo, Munisípiu Dili iha kazu violasaun doméstika 3 no akontese kazu insendiu ida neebe akontese iha Fatuhada Luru-Mata, kazu estraga sasán ida akontese iha Taibesi, Postu Administrativu Nain Feto, tanba suspeitu lanu, akontese kazu maus tratus no ofensas integridade fízika ida hasoru menor nee akontese iha Vera Krus inklui kazu asaltu malu iha Metinaro.
“Durante selebrasaun loron matebian ita rejista kazu 8,” hatete Komandante PNTL, Munisípiu Dili Superintendente Xefe Polísia, Orlando Gomes ba jornalista sira iha nia knaar fatin Eskudra Dom Aleixo, Tersa (04/11/2025).
Nia informa , durante selebrasaun matebian Komandu PNTL Dili rejista asidente tráfiku motor soke kareta ida iha área Praia dos Coqueiros, nunee Departamentu Seguransa Tránzitu Rodaviaria Munisípiu Dili halo hela atendimentu ba kazu nee.
“Kazu sira neebe mak hanesan ofensa integridade fízika nee krimi publiku, nunee ita nia investigador sira daudaun nee kontinua halo investigasaun hodi aprezenta ba Ministeriu Públiku,” nia informa.
Orlando hatutan, situasaun ein-jerál iha selebrasaun finadu iha loron 1 no 2 Novembru situasaun lao diak. Komunidade sira karii ai-funan too tuku 10 kalan, laiha perturbasaun orden publiku iha momentu dia 1 no dia 2. Situasaun jeral iha kapital Dili lao diak teb-tebes, ema hotu iha seguru nia laran hodi kari ai-funan iha rate.
Nia hatutan, durante loron rua iha loron 1 too 2 de Novembru polísia la detein detidu ruma, mai iha sela detensaun.
Jornalista: Jeniche da Costa
Editora: Domingas Gomes
