DILI, STLTIMORLESTE.com – Kadaver Abel Pereira Postu Segundu Sargento vizita ikus Kuartel Jeneral F-FDTL Fatuhada, Dili, Kuarta (05/11/2025).
Tuir observasaun STL iha terenu nota katak, familia evakua Kadaver Abel Pereira Postu Segundu Sargento, hodi halo vizita ikus iha Kuartel Jeneral F-FDTL Fatuhada, Dili. Saudozu hasoru malu ikus ho nia maluk militar sira neebe durante servisu hamutuk iha instituisaun F-FDTL durante tinan 15, matebian nia maluk sira fo kontenesia ikus mos ba matebian ho matan been, tanba lakon sira nia maluk diak ida husi sira nia leet.
Xefe Estadu Maior Jeneral FALINTIL- Forsa Defeza Timor Leste (F-FDTL), Tenente Jenerál Domingos Raúl “Falur Rate Laek” hatete, instituisaun F-FDTL lakon membru diak ida neebe estadu investe atu mai hodi servisu ba nasaun no povu ida nee, maibe lakon husi familia nia leet.
“Mate nee halo ita tristeza boot, tanba lakon ita nia familia ida, instituisaun lakon tan nia ema diak ida, neebe ita hanoin nia servisu durante hamutuk ho ita. Sente triste, familia mos triste no Instituisaun F-FDTL mos triste,” hatete Xefe Estadu Maior Jeneral F-FDTL, Tenente Jenerál Domingos Raúl “Falur Rate Laek” ba jornalista sira Kuartel Jeneral Fatuhada, Dili, Kuarta (05/11/2025).
Nia dehan, estadu investe ba matebian Abel Pereira Postu Segundu Sargento atu mai servi instituisaun F-FDTL, servi nasaun no povu ida nee, maibe distinu mak distina tiha ona nunee no lakon ona husi instituisaun nia leet nomos familia.
“Ita hotu iha nee manifesta ita nia ultima omenajen ba matebian, maibe hau koalia fila-fali ita moras ema mak fo han ita, ema seluk mak haree ita too ita mate mos ema seluk mak hakoi ita, tanba bainhira ita sei moris tenke kuidadu saude hodi servi ba instituisaun ida nee,” nia deklara.
Jornalista: Jeniche da Costa
Editora: Dominas Gomes
