DILI, STLTIMORLESTE.com – Feto bainhira hetan oportunidade ruma atu partisipa iha dezenvolvimentu nasional, tenke prontu hatudu ba mane katak feto mos bele.
Kestaun nee hatoo husi Xefe Departamentu Korespondensia no Arkivu Prezidensia Republika, Rita Angelina da Luz Mota liu husi nia mensajen ba Feto neebe publika iha media Prezidensia Republika, Kuarta (05/11/2025 ).
Nia hatete, feto tenke prontu bainhira hetan oportunidade atu partisipa iha prosesu dezenvolvimentu nasional.
“Hakarak enkoraja feto sira bainhira iha oportunidade atu partisipa iha dezenvolvimentu nasaun nia, ita tenke prontu no ba joven feto sira buka atu hakaas aan estuda makaas hodi hetan oportunidade kontribui ba dezenvolvimentu nasaun doben Timor Leste,” dehan Rita.
Iha biban nee nia mos husu ba joven feto sira nafatin hakaas aan hodi estuda makaas, nunee bele hasae kapasidade hodi kontribui ba prosesu konstrusaun estadu.
Nunee mos iha selebrasaun loron Nasional Feto Timor Leste ba dala 49 ho tema Feto Timor-Leste Selebra O Nia Direitu, Igualdade no opportunidade, Prezidensia Republika selebra no fo konese figura feto inspiradora sira iha Prezidensia Republika.
Rita Angelina da Luz Mota, nuudar funsionaria publika exemplar neebe servisu iha Prezidensia Republika desde tinan 2006, no agora asumi kargu importante hanesan Xefe Departamentu Korespondensia no Arkivu.
Xefi Rita halao papel importante rua iha familia, nia mak inan, parseiru, no bin-alin neebe enfatiza importansia atu tau matan diak ba uma laran. Iha servisu fatin, Rita asumi nia kargu nuudar Xefe Departamentu, fo apoiu Tekniku no Administrativa tomak. Asegura korespondensia entrada no saida rejista tuir regulamentu, dokumentu hotu-hotu arkivu ho ordem, no mantein aktualizadu arkivu internu sira.
Maske hasoru dezafiu hanesan komunikasaun família neebe menus no hasoru karakter publiku oi-oin iha atendimentu publiku, Rita uza pasiensia, haraik-an no maturidade hodi solusiona. Nia ho ninia família halao “Programa Habelun” fulan-fulan hodi vizita fatin, rona malu, no fahe ksolok. Dezafiu sira nee nia haree nuudar oportunidade atu kuida an no manten ninia saude fíziku no mental.
Rita nia istoria hanesan espellu ida neebe hatudu katak feto iha Timor-Leste bele dezempena papel importante iha família no iha servisu fatin, ho direitu no oportunidade hanesan. Ba Rita, tema loron nee signifika katak feto hotu-hotu hanesan mane, tenki hetan direitu, responsabilidade no valor neebe hanesan iha moris família no servisu. Ida nee mak vizaun atu alkansa nasaun dezenvolvimentu ida neebe justu no efitivu.
Jornalista: Emerenciana Pinto
Editora: Domingas Gomes
