DILI, STLTIMORLESTE.com – Prezidente Republika (PR), Jose Ramos Horta halao advokasia makaas hodi promove feto iha vida politika no administrasaun publika sira.
Kestaun nee hatoo husi Xefe Kasa Sivil Prezidensia Republika, Jesuina Maria Ferreira Gomes ba jornalista sira, iha Palasiu Prezidensial, Nicolau Lobato, Bairru Pite, Dili, Kinta (05/11/2025 ) hatete, Prezidente Republika durante nee halo advokasia makaas no promove feto iha kargu importante sira.
Prezidente Republika hanesan Prezidente ida neebe halo advokasia makaas no promosaun ba feto nia liu liu feto iha vida politika, feto iha vida administrasaun publika no serbisu publika sira seluk ida nee bele haree husi posizaun ida neebe ke okupa husi Prezidensia da Republika.
“Iha nee iha posizaun save tolu neebe Prezidente nomeia feto mak assume ida mak Xefe kasa sivil, adjunta Xefe kasa sivil, ho Doretora Jeral, laos deit iha nivel save iha nivel diresaun nomos departamentu iha prezidensia posizaun hamutuk 26 no 11 posizaun nee okupa husi feto maluk sira ida nee boas pratikas neebe Prezidente hakarak hatudu iha Prezidensia no Prezidente hakarak atu promove mos iha Governu no orgaun estadu seluk,” dehan Xefe Kasa Sivil nee.
Xefe Kaza Sivil nee dehan, Prezidente Republika promove feto iha Prezidensia Republika no Prezidente rasik hakarak, atu promove tan iha Governu nomos orgaun estadu seluk, konaba oinsa promove feto iha posizaun importante sira.
Aleinde nee total funsionariu iha palasiu Prezidensial 510 numeru feto 130 nee koresponde ba iha 25%, ida nee future presiza hasae liu tan partisipasaun feto nia iha serbisu Prezidensia Republika maibe sira neebe mak assume kargu numeru diak tebes 44% nee diak liu persentajen hatudu iha funsaun publika neebe feto porvolta 35% assume kargu.
Nunee mos Prezidente Republika, Jose Ramos Horta liu husi mensajen loron feto hatete diak liu hahu karik balansu ba realidade konaba igualdade jeneru, tuir konstituisaun lei sira hotu laiha diskriminasaun no eskluzaun bazeia ba jeneru ou iha relizaun etnia nomeasaun nee konstituisaun neebe ke diak iha realidade rai laran.
“Maibe karik ita halo balansu situasaun feto iha rai laran, iha parlamentu feto hira mak iha neeba, iha Governu hahu husi nivek ministerial too sekretariu estadu feto hira, ita hahu halo analize feto sira iha parlamentu no governu mai husi partidu ida neebe,” katak PR, Horta.
Prezidente Republika hatete, iha instituisaun sira nee mak iha poder hodi halo lezislasaun hatudu dalan ba elifikasaun estadu hatudu dalan ba parte hotu hotu dezenvolvimentu justisa, politika externa defeza no seguransa.
Jornalista: Emerenciana Pinto
Editora: Carme Ximenes
